ELM VƏ TƏHSİL
“İS(S)İ – 2016: İqtisadiyyatın liberallıq-dirijistlik səviyyəsi” kitabı üç dildə nəşr olunub
Bakı, 18 yanvar, AZƏRTAC
Azərbaycan Milli Elmlər Akademiyasının (AMEA) İqtisadiyyat İnstitutu tərəfindən “İS(S)İ - 2016: İqtisadiyyatın liberallıq-dirijistlik səviyyəsi” kitabı Azərbaycan, rus və ingilis dillərində çapdan çıxıb.
AMEA-dan AZƏRTAC-a bildirilib ki, iqtisadiyyatın özünütənzimləmə mexanizmləri ilə dövlət tənzimləməsi arasında səmərəli müvazinət məsələlərinə həsr olunan nəşrin rəyçiləri iqtisad üzrə fəlsəfə doktorları Yaşar Məmmədov və Ramil Əliyevdir.
Kitabda İqtisadiyyat İnstitutunda hazırlanmış metodologiya əsasında 95 ölkədə iqtisadiyyatın liberallıq-dirijistlik səviyyəsi dövlətin iqtisadiyyata modelyaradıcı müdaxilələrinin ölçülməsi əsasında müqayisəli dəyərləndirilib. Nəşrdə, həmçinin yaxın illərdə Azərbaycan iqtisadiyyatının daha da liberallaşdırılmasının zəruriliyi və tələb olunan iqtisadi islahatların başlıca istiqamətləri nəzəri formada əsaslandırılıb.