SİYASƏT
IV İslam Həmrəyliyi Oyunlarının açılışı ərəb KİV-lərinin diqqət mərkəzindədir
Əbu-Dabi, 13 may, AZƏRTAC
Müsəlman ölkələri üçün ən gözlənilən hadisənin - IV İslam Həmrəyliyi Oyunlarının təntənəli açılış mərasimi Birləşmiş Ərəb Əmirlikləri, Misir, Səudiyyə Ərəbistanı, Qətər və başqa müsəlman ölkələrinin aparıcı KİV-ləri tərəfindən geniş işıqlandırılır.
Bildirilir ki, 65 min tamaşaçı yeri olan Bakı Olimpiya Stadionunda İslamiadanın son dərəcə gözəl və möhtəşəm açılış mərasimi olub. Azərbaycan Prezidenti İlham Əliyev IV İslam Həmrəyliyi Oyunlarını açıq elan edib. Azərbaycanın Birinci vitse-prezidenti, “Bakı-2017” İslam Həmrəyliyi Oyunlarının Təşkilat Komitəsinin sədri Mehriban Əliyeva dörd qitənin nümayəndələrini birləşdirməyə xidmət edən İslam Həmrəyliyi Oyunlarının Azərbaycanda keçirilməsinin əhəmiyyəti barədə nitqlə çıxış edib. İslam Əməkdaşlıq Təşkilatının Baş katibi Yusif Əl-Osaymin də təbrik nitqi ilə çıxış edərək, bu idman bayramının belə yüksək səviyyədə təşkil edilməsinə görə Azərbaycan rəhbərliyinə dərin təşəkkürünü bildirib.
Ərəb KİV-ləri şərhçilərinin fikrincə, Oyunların açılış mərasiminin Təşkilat Komitəsi tərəfindən yüksək səviyyədə və səylə hazırlanması gözlənilən hadisə idi və Azərbaycan bütün dünyaya növbəti dəfə nümayiş etdirdi ki, birinci Avropa Oyunları, “Formula 1” Avropa Qran-prisi kimi iri beynəlxalq idman tədbirlərini və digər tədbirləri ən yüksək səviyyədə keçirə bilər.
Ərəb KİV-ləri xüsusi vurğulayırlar ki, açılış mərasimi əsl idman bayramına çevrilib. Nümayiş etdirilən slayd və obrazlarda Azərbaycan İslam sivilizasiyasının sanballı nailiyyətlərini və inkişaf mərhələlərini, Azərbaycanın İslam dünyasının tarixi və ənənələri ilə qırılmaz tellərlə bağlı olduğunu əks etdirib.
KİV-lər yazırlar ki, İslam Həmrəyliyi Oyunlarının Təşkilat Komitəsi İslamın əsas xarakterik əlamətlərini çox yüksək səviyyədə əks etdirib. Alim Qasımovun improvizə edilmiş minarədən ürəkdən azan oxuması xüsusilə təsirləndirdi. Qədim xalq melodiyaları və Azərbaycan bəstəkarlarının ölməz əsərlərinin sədaları ilə müşayiət olunan parlaq süjetlər nümayiş etdirildi.
Ərəb KİV-lərində xüsusi vurğulanır ki, Azərbaycan İslamiada keçirməklə, möhtəşəm və yaddaqalan açılış mərasimi ilə İslam Əməkdaşlıq Təşkilatının üzvü olan ölkələr arasında və bütün planetimizdə birlik, harmoniya, qarşılıqlı anlaşma, sülh və həmrəylik çağırışı ilə dünyaya ismarıc göndərdi.
Asya Hacızadə
AZƏRTAC-ın xüsusi müxbiri
Əbu-Dabi