Bakı, 31 may (AZƏRTAC, Türkan Abdullayeva). Mayın 31-də İçərişəhərdə - Qoşa qala qapısı meydanında Avropa şəhərciyi (Eurovillage-2014) təşkil edilmişdir.

AZƏRTAC xəbər verir ki, tədbir Avropa İttifaqı (Aİ) və ona üzv olan ölkələrin Azərbaycandakı səfirliklərinin təşkilatçılığı keçirilir.

Birgünlük tədbirdə Avropa İttifaqına üzv olan Almaniya, Fransa, İtaliya, Böyük Britaniya, Niderland, İsveç, Rumıniya və digərləri olmaqla, ümumilikdə 18 ölkənin çadırları qurulmuşdur.

Tədbirdə “İçərişəhər” Dövlət Tarix-Memarlıq Qoruğu İdarəsinin elmi-mədəni mərkəzinin direktor əvəzi Mikayıl Nəcəfov artıq ikinci ildir İçərişəhərdə Avropa şəhərciyinin keçirildiyini və bunun ənənəyə çevrildiyini söyləmişdir. O, belə tədbirlərin təşkil edilməsinin İçərişəhərin inkişafının göstəricisi olduğunu vurğulayaraq bildirmişdir ki, buna Prezident İlham Əliyevin və ölkənin birinci xanımı Mehriban Əliyevanın İçərişəhərə xüsusi diqqət və qayğı göstərmələri nəticəsində nail olmuşuq.

Diqqətə çatdırılmışdır ki, Avropa şəhərciyini keçirməkdə əsas məqsəd ittifaqa üzv ölkələrin mədəniyyətini və İçərişəhərin canlı tarix olduğunu nümayiş etdirməkdir.

Avropa İttifaqının Azərbaycandakı nümayəndəliyinin rəhbəri Malena Mard tədbirin “İçərişəhər” Dövlət Tarix-Memarlıq Qoruğu İdarəsinin dəstəyi ilə keçirildiyini diqqətə çatdıraraq quruma təşəkkürünü bildirmişdir.

Qeyd etmişdir ki, ziyarətçilər stendlərə yaxınlaşaraq Avropa İttifaqı və ona üzv dövlətlər barədə məlumat ala və bu ölkələrin zəngin mədəniyyətləri ilə daha yaxından tanış ola bilərlər.

Malena Mard hər kəsi bir gün ərzində Avropanı görməyə, öyrənməyə dəvət etmişdir.

Sonra Avropa İttifaqına üzv olan bir sıra ölkələrin Azərbaycandakı səfirləri və səfirliklərin nümayəndələri öz dillərində qonaqları salamlamışlar və Aİ-nın himni səsləndirilmişdir.

Daha sonra iştirakçı ölkələr haqqında videoçaxrların və onlara məxsus musiqi və rəqslərin nümayişinə başlanılmışdır.

Avropa şəhərciyində çadırları qurulmuş ölkələr öz stendlərində ölkələri və Azərbaycandakı fəaliyyətləri barədə təqdimat edirlər. Şəhər sakinləri və xarici qonaqlar həmin çadırlara yaxınlaşaraq müxtəlif ölkələrin mədəniyyətləri, tarixləri, mətbəxləri və milli xüsusiyyətləri barədə əyləncəli və maraqlı məlumatlar alırlar. Həmçinin həmin ölkədə təhsil imkanlarının əks olunduğu kitablar, bukletlər, broşürlər və ölkəyə məxsus suvenirlər təqdim edilir.

Avropa şəhərciyində ziyarətçilər məlumat köşklərindən “pasport” alaraq bütün ölkələrin stendlərinə yaxınlaşıb verilən sualları cavablandırmaqla “pasport”larına möhür vurdururlar. Sonra isə həmin “pasport”ları məlumat köşklərinə qaytarır, hədiyyə alaraq tədbirdən tam yararlanırlar.

Gün ərzində face art, mükafatlı viktorinalar, karaoke keçirilir, Avropa mətbəxi, musiqi və teatr ifaları nümayiş olunur.

Axşam proqramı isə Avropa ifaçılarının konsertindən, o cümlədən Hollandiyadan olan “Eurovision” mahnı müsabiqəsinin finalçısı Joan Franka, klassik musiqini müasir və maraqlı tərzi ilə ifadə edən xorvatiyalı violonçel ifaçısı Ana Rucner və bütün Avropada mükafatlar almış pop-rok ifaçıları Estoniyanın “Traffic” qrupundan ibarət olacaqdır.

Bu gün şəhərimiz sakinləri və qonaqlar İçərişəhərdəki Avropa şəhərciyini gəzərkən özlərini virtual olaraq Avropada hiss edirlər.