MƏDƏNİYYƏT
İçərişəhərdə Avropa şəhərciyi təşkil ediləcəkdir VİDEO
Bakı, 25 may (AZƏRTAC). Mayın 31-də İçərişəhərdə - Qoşa qala qapısı meydanında Avropa şəhərciyi (Eurovillage-2014) təşkil ediləcəkdir.
AZƏRTAC xəbər verir ki, tədbir Avropa İttifaqı və bu quruma üzv olan ölkələrin Azərbaycandakı səfirliklərinin təşkilatçılığı ilə keçiriləcəkdir.
Birgünlük tədbirdə Avropa İttifaqına üzv olan bir sıra ölkələrin çadırları qurulacaqdır. Şəhər sakinləri və xarici qonaqlar həmin çadırlara yaxınlaşaraq müxtəlif ölkələrin mədəniyyətləri, tarixləri və milli xüsusiyyətləri barədə əyləncəli və maraqlı şəkildə məlumat alacaqlar.
Bundan əlavə, tədbirdə qonaqlar üçün geniş mövzulu viktorinaların, xor kollektivləri və müxtəlif janrlarda ifaçıların çıxışlarının və furşetlərin təşkil olunması planlaşdırılmışdır.
Tədbirin sonunda isə Niderland, Xorvatiya, Estoniyadan olan musiqiçilərin konserti təqdim olunacaqdır.
Həmin gün şəhərimizin sakinləri və qonaqlar İçərişəhərdəki Avropa şəhərciyini gəzərkən özlərini virtual olaraq Avropada hiss edəcəklər.