İQTİSADİYYAT
İctimai nəqliyyatda kartla vahid ödəmə sistemi tətbiq olunacaqdır
Bakı, 1 may (AZƏRTAC). Mayın 1-də bir qrup media işçisi Nəqliyyat Nazirliyinin Nəqliyyatı İntellektual İdarəetmə Mərkəzi ilə tanış olmuşdur.
Tanışlıq zamanı mərkəzdə fəaliyyət göstərən şöbələr və onların iş funksiyaları, eləcə də paytaxtın nəqliyyat sisteminin təkmilləşdirilməsində, nəqliyyat xidmətlərinin keyfiyyətinin yüksəldilməsində, ictimai nəqliyyatın hərəkətinin tənzimlənməsində, paytaxt yollarında hərəkətə nəzarətin təşkilində və tıxac probleminin aradan qaldırılmasında böyük əhəmiyyətə malik olan intellektual idarəetmə sistemi barədə jurnalistlərə ətraflı məlumat verilmişdir.
Nəqliyyatı İntellektual İdarəetmə Mərkəzinin texniki istismar üzrə direktoru İbrahim Əliyev AZƏRTAC-a müsahibəsində bildirmişdir ki, nəqliyyatı intellektual idarəetmə sisteminin əsas məqsədi əhalinin rahatlığını təmin etməkdir. Sistemin 90 faizi demək olar ki, qurulmuşdur. Sadəcə olaraq, onun elementlərinin, parametrlərinin, avadanlığının uyğunlaşdırılması işləri, həmçinin tətbiqetmə prosesi aparılır. Buna görə də bəzi hallarda sistemdə bir sıra problemlər yaranır. Bu isə hazırda optimallaşdırma işləri aparıldığı üçün təbii haldır.
Bu sistem layihə üzrə mərhələlərlə həyata keçirilir. Üç mərhələdən ibarət olan sistemin hazırda birinci mərhələsi paytaxtın Kiçik Bakı adlanan əsas küçə və prospektlərini əhatə edir. Bu proses ikinci mərhələdə Böyük Bakı və Abşeron ərazisini, üçüncü mərhələdə isə respublikanın bütün bölgələrini əhatə edəcəkdir. Birinci mərhələdə Bakıda intellektual nəqliyyat sistemi avadanlığının quraşdırılması demək olar ki, artıq yekunlaşmışdır. Dayanacaqlarda yerləşdirilməsi nəzərdə tutulan 664 informasiya sistemindən 600-ü hazırda qurulmuşdur. 64 informasiya sistemi isə şəhərdə aparılan təmir-tikinti işləri ilə əlaqədar gələcəkdə qurulacaqdır. Bundan başqa, 269 nöqtədə 326 kamera yerləşdirilmişdir. Müşahidə kameraları sistemi yollarda yaranan vəziyyəti real rejimdə izləmək imkanı yaradır. İşıqforların yaxınlığında asfalt altında quraşdırılan halqavarI aşkarlama sisteminin köməyi ilə isə nəqliyyat vasitələrinin hərəkət sürəti, nəqliyyat axınlarının intensivliyi, tıxacların yarandığı sahələr, tıxacın uzunluğu üzrə operativ və dəqiq informasiyanın toplanılması, eləcə də onların təhlili təmin edilir. Eyni zamanda, yollarda quraşdırılan elektron rəqəmsal tablolar vasitəsilə əsas istiqamətlər üzrə yolun sıxlığı ilə bağlı vəziyyət və təmir-tikinti işləri səbəbindən bağlı olan yollar haqqında sürücülərə məlumatlar çatdırılır, onlara alternativ yollardan istifadə etmək imkanı yaradılır.
Bu sistemin önəmli hissəsindən biri də qeyri-qanuni parklanmaya nəzarətdir. Paytaxtımızda çoxlu avtomobil dayanacaqları inşa olunur ki, artıq onlardan bir neçəsinin tikintisi başa çatmaq üzrədir. Elə sürücülər vardır ki, avtomobillərini qadağan olunmuş yerlərdə saxlayırlar. Bu isə ictimai nəqliyyatın hərəkətinə mane olur. Qeyri-qanuni parklanmaya nəzarət sistemi də belə halların aradan qaldırılması üçün nəzərdə tutulmuşdur.
Nəqliyyatı intellektual idarəetmə sistemində hazırda uyğunlaşdırma işlərinin aparıldığını deyən İ.Əliyev qeyd etmişdir ki, bu yaxınlarda sistemin ikinci mərhələsinə başlanılacaqdır. İkinci mərhələdə əsas iş ictimai nəqliyyatda kartla vahid ödəmə sisteminin tətbiqi olacaqdır. Bu sistem vasitəsilə bütün nəqliyyat növlərində kartla ödəmə mümkün olacaqdır. Nəqliyyatda vahid ödəmə sisteminin ilin sonunadək tətbiqi planlaşdırılır. Sonra isə nəqliyyatı intellektual idarəetmə sisteminin üçüncü mərhələsi başlanılacaq ki, bu da respublikanın bütün bölgələrində yerləşən nəqliyyat infrastrukturunu əhatə edəcək və 2015-ci ildə tam başa çatdırılacaqdır.
Nəqliyyatı İntellektual İdarəetmə Mərkəzi ilə tanışlıq jurnalistlərdə xoş təəssürat doğurmuşdur.