MƏDƏNİYYƏT


İki bayrama iki konsertlə

Bakı, 25 may, AZƏRTAC

Mütəmadi maraqlı layihələrlə balaca teatrsevərləri sevindirən, hazırladığı tamaşalarla onların tamaşaçı zövqünü formalaşdırmağa çalışan Abdulla Şaiq adına Azərbaycan Dövlət Kukla Teatrında daha bir maraqlı layihə reallaşacaq.

Teatrın mətbuat xidmətindən AZƏRTAC-a bildirilib ki, 28 may - Respublika Günü münasibətilə teatr Dənizkənarı Bulvar İdarəsi ilə birlikdə bulvar ərazisində açıq havada konsert reallaşdıracaq. Teatrın nəzdində fəaliyyət göstərən “Oyuq” teatr-studiyasının həvəskar aktyorları tədbirə dəvət olunacaq valideyn himayəsindən məhrum olmuş uşaqlar, eləcə də şəhər sakinləri qarşısında öz istedadlarını nümayiş etdirəcəklər. Mayın 28-də saat 18:00-da Dənizkənarı Milli Parkda (Kukla Teatrının yaxınlığındakı ərazisi) başlanacaq konsertdə studiyanın fəalları kiçik səhnəciklər nümayiş etdirəcək, repertuarlarında yer alan vətənpərvərlik mövzulu mahnılarını ifa edəcəklər.

Tədbirin təşkilində məqsəd balacalara bu günün önəmini aşılamaq və müstəqil dövlətimizin yetişən nəsillərə diqqət və qayğısını nümayiş etdirməkdir.

Teatr-studiyanın balaca izləyicilərinə bayram sovqatı bununla da kifayətlənmir. Belə ki, 1 iyun – Uşaqların Beynəlxalq Müdafiəsi Günü münasibətilə teatrda tamaşa-konsert təqdim olunacaq. “Oyuq”çular əvvəlcə repertuarlarında yer alan maraqlı səhnə işlərindən olan “Şahın xudpəsənd oğlu” tamaşasını nümayiş etdirəcək və ardında musiqi çələngini təqdim edəcəklər.

Qeyd edək ki, hər iki tədbir xeyriyyə məqsədilə təşkil olunur və balacaların iştirakı sərbəstdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.