İQTİSADİYYAT
“İki sahil” qəzeti “Əsrin müqaviləsi”nin 20 illiyinə və Neftçilər Gününə xüsusi buraxılış həsr edib
Xüsusi buraxılış ulu öndər Heydər Əliyevin bu sözləri ilə açılır: «Neft Azərbaycanın ən böyük sərvəti olub, xalqa, özü də təkcə indiki nəslə deyil, həm də gələcək nəsillərə mənsubdur».
Buraxılışda Prezident İlham Əliyevin neft sənayesi işçilərinin təltif edilməsi, onlara fəxri adların və Prezidentin fərdi təqaüdünün verilməsi haqqında 19 sentyabr 2014-cü il tarixli sərəncamları yer alıb. Həmçinin Azərbaycan neft sənayesinin çoxəsrlik tarixinə işıq salınaraq, 20 ildə imzalanmış beynəlxalq neft sazişlərinin iqtisadiyyatımızın dinamik inkişafında müstəsna rol oynadığı diqqətə çatdırılır.
Dövlət Neft Şirkətinin prezidenti Rövnəq Abdullayevin xüsusi buraxılışda dərc olunmuş bayram təbrikində bildirilir ki, Azərbaycan neftçiləri həmişə olduğu kimi, bu il də peşə bayramlarını sonsuz iftixar hissi və böyük ruh yüksəkliyi ilə qarşılayırlar.
Ölkəmiz son illər beynəlxalq qaz tədarükü sisteminə inamla daxil olaraq, bu sahədə yeni-yeni nailiyyətlərə imza atır. Bu inkişaf fonunda modern, innovativ, çevik, beynəlxalq səviyyəli sənaye kompleksinə çevrilmiş şirkət regional və qlobal əhəmiyyətli neft və qaz layihələrində dövlətimizi ləyaqətlə təmsil edir.
ARDNŞ-in prezidenti R.Abdullayevin «Azərbaycanın möhtəşəm enerji strategiyası» yazısında tarixə «Əsrin müqaviləsi» kimi daxil olan neft müqaviləsinin əhəmiyyəti geniş təhlil olunur. Qeyd edilir ki, müqavilənin imzalanmasından ötən 20 il ərzində Azərbaycanın geosiyasi əhəmiyyəti və nüfuzu yüksəlib, Qərb dünyası ilə münasibətləri strateji müstəviyə keçib. Enerji müstəqilliyimiz tam təmin olunub, Azərbaycan təbii qaz idxal edən ölkədən beynəlxalq miqyasda mühüm qaz ixracatçısına çevrilib.
Şirkətin birinci vitse-prezidenti, akademik Xoşbəxt Yusifzadənin, vitse-prezidentlər Süleyman Qasımovun, Elşad Nəsirovun, David Məmmədovun, Mikayıl İsmayılovun, Bədəl Bədəlovun, Xalik Məmmədovun, Rəhman Qurbanovun, Rəfiqə Hüseynzadənin, Tofiq Qəhrəmanovun, Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyevin, «Azneft» İstehsalat Birliyinin baş direktoru Daşqın İskəndərovun, «Azəriqaz» İB-nin baş direktoru Əkbər Hacıyevin, «Azərneftyağ» Neft Emalı Zavodunun direktoru Rövşən Həsənovun, Bakı Ali Neft Məktəbinin rektoru, YAP Siyasi Şurasının üzvü Elmar Qasımovun, «İki sahil» qəzetinin baş redaktoru, Əməkdar jurnalist Vüqar Rəhimzadənin və başqalarının xüsusi buraxılışda yer almış məqalələrində «Əsrin müqaviləsi»nin imzalanmasından sonra ölkəmizin neft-qaz sektorunda əldə olunan uğurlar ulu öndər Heydər Əliyevin müəllifi olduğu neft strategiyasının təntənəsi kimi dəyərləndirilir. Yazı müəllifləri bu fikri xüsusi vurğulayırlar ki, Azərbaycan ulu öndər Heydər Əliyevin neft strategiyasının bu gün Prezident İlham Əliyev tərəfindən uğurla həyata keçirilməsi nəticəsində ən yüksək zirvələri fəth edir, təkcə regionun deyil, Avropanın enerji təhlükəsizliyində mühüm rol oynayır.
Xüsusi buraxılış ulu öndər Heydər Əliyevin bu fikirləri ilə tamamlanır: «Əsrin müqaviləsi»ndə qarşıya qoyulmuş vəzifələrə layiqincə əməl edilməsi, yeni neft strategiyamızın uğurla həyata keçirilməsi Azərbaycanın dövlət müstəqilliyinin daimiliyinin əsas qarantlarından biridir».
Buraxılış ümumilikdə Azərbaycan Respublikası Dövlət Neft Şirkəti strukturlarının fəaliyyəti, neft-qaz sənayesi işçilərinin fədakar əməyi və qazandıqları yüksək nailiyyətlər və qarşıda duran vəzifələr barədə dolğun təəssürat yaradır.