CƏMİYYƏT


İkinci Dünya müharibəsi zamanı həlak olmuş azərbaycanlıların xatirəsi əbədi yaşayacaq

A+ A

Bakı, 27 oktyabr, AZƏRTAC

Respublika Veteranlar Təşkilatında İkinci Dünya müharibəsində Moldova Respublikası ərazində həlak olmuş və itkin düşmüş sayılan 206 nəfər azərbaycanlı döyüşçünün dəfn olunduğu yerlərin aşkarlanması və xatirəsinin yad edilməsi ilə bağlı tədbir keçirilib. Eyni zamanda, “İkinci Dünya müharibəsində Moldova Respublikası ərazisində həlak olmuş azərbaycanlıların xatirə kitabı”nın Respublika Veteranlar Təşkilatında təqdimatı olub.

Tədbirdə Moldovanın ölkəmizdəki səfiri George Leuka, Prezident Administrasiyasının ictimai-siyasi məsələlər şöbəsinin məsul əməkdaşı Rasim Mirzəyev, Azərbaycan Milli Elmlər Akademiyası Tarix İnstitutunun, Ehtiyatda Olan Zabitlər Konfederasiyasının rəhbərliyi, müharibə veteranları, ziyalılar, gənclər, hərbçilər iştirak ediblər.

AZƏRTAC xəbər verir ki, tədbirdə Respublika Veteranlar Təşkilatının sədr müavini Cəlil Xəlilov çıxış edərək deyib ki, təşkilat İkinci Dünya, Qarabağ, Əfqanıstan müharibələrində döyüşmüş, həlak olmuş, itkin düşmüş əsgər və zabitlərimizin taleyinə aydınlıq gətirilməsi istiqamətində ardıcıl iş aparır. Böyük Vətən müharibəsində Azərbaycan faşizm üzərində Qələbəyə böyük töhfələr verib. Azərbaycanlılar bu müharibədə əsl igidlik göstərib. Onlardan 127 nəfəri Sovet İttifaqı Qəhrəmanı adına, on minlərlə soydaşımız orden və medallara layiq görülüb. Azərbaycanlıların döyüş yolu həm də Moldovanın alman-faşist işğalçılarından azad olunmasından keçib. Moldovada döyüşən azərbaycanlılar əsasən 223-cü milli atıcı diviziyanın tərkibində olublar. Həmin diviziyanın döyüş yolu 1942-ci ilin yayından Şimali Qafqazdan başlayaraq Ukrayna, Moldova, Bolqarıstan, keçmiş Yuqoslaviya və Macarıstandan keçməklə Avstriyanın paytaxtı Vyanayadək davam edib. Bu Qələbədən 71 il keçməsinə baxmayaraq, həmin müharibədə iştirak etmiş azərbaycanlıların bir hissəsinin taleyi hələ də aydınlaşmayıb. Lakin Azərbaycanın Moldovadakı səfirliyinin əməkdaşlarının və Azərbaycan diasporunun apardıqları araşdırmalar nəticəsində vaxtilə itkin düşmüş soydaşlarımızdan 206-nın kimlikləri, təvəllüd tarixləri, rütbələri, hərbi xidmətə çağırıldıqları tarix, məntəqələr, dəfn yerləri, xidmət etdikləri hərbi hissələr müəyyənləşib, sənədlərinin saxlandığı arxivlər dəqiqləşdirilib. Moldovanın əksər ərazilərində aşkarlanan döyüşçü məzarları azərbaycanlıların necə vuruşduqlarının sübutudur. Beləliklə, müharibədə həlak olmuş soydaşlarımızın haqqında dəqiq məlumatın əldə olunması vacib məsələdir və Azərbaycan xalqının qəhrəmanlıqlarının dünya ictimaiyyətinə çatdırılmasında mühüm əhəmiyyətə malikdir. Artıq qələbə günündə və digər əlamətdar bayramlarda həmin ölkələrdə yaşayan soydaşlarımız, eləcə də yerli ictimaiyyət həmin məzarları ziyarət edirlər. Bu, həmin insanların yaxınları ilə yanaşı, hər birimizi məmnun edir”.

Azərbaycanın Moldovadakı keçmiş səfiri Namiq Əliyev soydaşlarımızın taleyinə aydınlıq gətirilməsində bu ölkənin dövlət orqanlarının və müvafiq qurumlarının, xalqının göstərdiyi köməkdən, səfirliyimizin bu istiqamətdəki fəaliyyətindən danışıb.

Qeyd edib ki, müharibə zamanı Moldova ərazisində azərbaycanlılardan ibarət 223-cü Belqrad və 416-cı Taqanroq atıcı diviziyalar kimi iki hərbi birləşmə döyüşüb. İki il yarım davam edən axtarışlar və araşdırmalar, eləcə də Rusiyanın və Moldovanın müdafiə nazirlikləri ilə əməkdaşlıq nəticəsində indiki Moldova Respublikası ərazisində həlak olmuş 206 Azərbaycan döyüşçüsünün məzarı aşkar edilib, onlar haqqında məlumatlar toplanıb. Araşdırmaların məqsədi Böyük Vətən müharibəsi zamanı Moldovanın alman-faşistlərdən azad edilməsi uğrunda qəhrəmancasına vuruşmuş və öz həyatını qurban vermiş azərbaycanlıların tarixi xatirəsini bərpa etməkdir. Bu iş Prezident İlham Əliyevin Böyük Vətən müharibəsi zamanı həlak olmuş Azərbaycan oğullarının xatirəsini əbədiləşdirmək siyasəti çərçivəsində həyata keçirilib.

İkinci Dünya müharibəsi veteranı Aleksandr Qritçenko, Nəsimi Rayon Veteranlar Təşkilatının sədri İsmayıl Fərəcov və digər veteranlar müharibə xatirələrini yada salıb, döyüşçülərimizin şücaətindən danışıblar. Bildirilib ki, Azərbaycanın öz döyüşçü oğullarını xatırlaması təqdirəlayiqdir. Respublika Veteranlar Təşkilatının bu işə dəstək verməsi gənclərin hərbi vətənpərvərlik tərbiyəsində böyük rol oynayır. Onlar itkin düşmüş soydaşlarımız barədə məlumatların tapılmasını yüksək qiymətləndirərək bu xeyirxah işdə, eləcə də “İkinci Dünya müharibəsində Moldova Respublikası ərazisində həlak olmuş azərbaycanlıların xatirə kitabı”nın hazırlanmasında əməyi olanlara, o cümlədən Azərbaycanın bu ölkədəki səfirliyinin əməkdaşlarına minnətdarlıqlarını bildiriblər.

Türkiyənin Müharibə Veteranları Dərnəyinin Qars vilayəti üzrə rəhbəri Yüksəl Öztürk ulu öndər Heydər Əliyevin “Biz bir millət, iki dövlətik” kəlamını xatırladıb, dost və qardaş azərbaycanlı veteranlarla görüşməkdən məmnunluğunu bildirib, tədbirin əhəmiyyətini vurğulayıb.

Moldovada döyüşlərdə həlak olmuş şəxslərin yaxınları tədbirin təşkilatçılarına və Azərbaycanın Moldovadakı səfirliyinin əməkdaşlarına minnətdarlıqlarını çatdırıblar.

Sonra bir qrup şəxsə Respublika Veteranlar Təşkilatının yubiley medalları təqdim edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.