Bakı, 18 aprel, AZƏRTAC

Qaradağ Rayon İcra Hakimiyyətində 2015-ci ilin birinci rübündə rayonun sosial-iqtisadi inkişafının yekunlarına və Prezident İlham Əliyevin Nazirlər Kabinetinin iclasındakı nitqindən irəli gələn vəzifələrə həsr olunan hesabat yığıncağı keçirilib.

Rayon icra hakimiyyətinin başçısı Süleyman Mikayılov Qaradağın hərtərəfli inkişafı üçün işlərin davam etdirildiyini bildirib.

Sonra icra hakimiyyəti başçısının birinci müavini Emil Abbasov hesabat məruzəsi ilə çıxış edərək deyib ki, ötən rübün yekunlarına əsasən rayon üzrə 150,5 milyon manatlıq sənaye məhsulu istehsal edilib, iqtisadiyyatın aparıcı sahəsini təşkil edən neft və qaz sənayesi müəssisələrində 129,5 min ton xam neft və 91,4 milyon kubmetr təbii qaz hasil olunub. Rayon üzrə 421 min ton sement, 14,8 min ton mişar daşı istehsal edilib, rabitə xidmətlərinin həcmi 585,7 min manat olub. Pərakəndə əmtəə dövriyyəsi 665,9 milyon manat, əhaliyə göstərilən pullu xidmətlər isə 38,5 milyon manat təşkil edib. Avtomobil nəqliyyatında fəaliyyət göstərən müəssisələr tərəfindən 239,6 min manatlıq xidmətlər göstərilib.

Hesabat dövründə Ələt və Sahil qəsəbələrinin ümumilikdə 8234 nəfəri səyyar “ASAN xidmət”dən yararlanıb.

Bildirilib ki, əhalinin məşğulluğunu təmin etmək məqsədi ilə mütəmadi olaraq qəsəbələrdə səyyar əmək yarmarkaları keçirilir.

Məlumat verilib ki, I Avropa Oyunları ilə əlaqədar Qaradağ rayonunda görüləcək işlərin mütəşəkkilliyinin təşkili və ortaya çıxan məsələlərin operativ həllinin təmin olunması məqsədilə rayon icra hakimiyyəti nəzdində qərargah yaradılıb.

Rayonda “Ümumrespublika yaşıllaşdırma” layihəsi çərçivəsində ağacəkmə kampaniyasına start verilib və hazırda kampaniya davam edir.

Hesabat dövründə dövlət proqramına əsasən Puta qəsəbəsindəki 326 nömrəli körpələr evi-uşaq bağçası və Lökbatan qəsəbəsindəki 7 nömrəli Bakı peşə məktəbi üçün yeni binaların inşası başa çatıb və istifadəyə tam hazır vəziyyətdədir. Hazırda Qobustan qəsəbəsindəki körpələr evi-uşaq bağçasında və Sahil qəsəbəsindəki 9 nömrəli xüsusi internat məktəbində əsaslı təmir işləri, Heydər Əliyev Fondunun təşəbbüsü ilə rayonun Lökbatan, Ümid qəsəbələrində yeni körpələr evi - uşaq bağçalarının inşası davam edir və Ələt qəsəbəsində yeni körpələr evi - uşaq bağçasının tikintisi üçün layihə-smeta sənədləri hazırlanır.

Sonra məruzə ətrafında çıxışlar olub.

Hesabat yığıncağının iştirakçıları adından Azərbaycan Prezidenti İlham Əliyevə müraciət qəbul edilib.

Sonda Prezident İlham Əliyevin 2015-ci il 4 mart tarixli Sərəncamı əsasında Azərbaycan Qızıl Aypara Cəmiyyətinin Qaradağ rayon bölməsinin rəhbəri Niyaz Eyvazova “Tərəqqi” medalı təqdim olunub.