İQTİSADİYYAT
İlin əvvəlindən 3,5 milyard manatlıq qiymətli kağız buraxılışı qeydiyyata alınıb
Bakı, 19 avqust, AZƏRTAC
Maliyyə Bazarlarına Nəzarət Palatası tərəfindən təqdim olunmuş məlumatlara görə, 2017-ci ilin əvvəlindən 3 milyard 568,5 milyon manatlıq qiymətli kağız buraxılışı qeydiyyata alınıb.
Dövlət Statistika Komitəsindən AZƏRTAC-a bildiriblər ki, qiymətli kağızlar bazarının ümumi emissiyasının 43,7 faizini səhmlər, 31,8 faizini Mərkəzi Bankın notları, 19,6 faizini dövlət istiqrazları, 4,9 faizini isə korporativ istiqrazlar təşkil edib. Bu dövr ərzində 983 milyon manatlıq səhmlər, Mərkəzi Bankın 776,2 milyon manatlıq notları, 301,3 milyon manatlıq dövlət istiqrazları və 193,6 milyon manatlıq korporativ istiqrazları Bakı Fond Birjasında keçirilmiş hərraclarda yerləşdirilib.
Bu ilin yanvar-iyun aylarında nominal dəyəri 663,1 milyon manat olan korporativ istiqrazlar, 64,7 milyon manat olan səhm və 28,9 milyon manatlıq dövlət istiqrazları tədavüldə olub.