İDMAN
İlqar Rəhimov: Paralimpiyaçı cüdoçularımız birinci Avropa Oyunlarında çıxışa tam hazırdırlar
Bakı, 26 may, Səxavət Quliyev, AZƏRTAC
“Bakı-2015” birinci Avropa Oyunlarının başlanmasına artıq sayılı günlər qalıb. Qitənin 6 mindən artıq idmançısı tarixdə ilk dəfə təşkil olunacaq Avropa Oyunlarında 253 dəst medal uğrunda mübarizə aparacaq. Birinci Avropa Oyunlarının əsas xüsusiyyəti ondan ibarətdir ki, bu mötəbər yarışda paralimpiyaçılar da güclərini sınayacaqlar.
Azərbaycan Milli Paralimpiya Komitəsinin prezidenti İlqar Rəhimov idmançılarımızın bu mötəbər yarışa hazırlığı və “Bakı-2015”in ölkəmiz üçün əhəmiyyəti ilə bağlı AZƏRTAC-ın müxbirinin suallarını cavablandırıb.
-İlqar müəllim, ölkəmizdə paralimpiya hərəkatı haqqında nə deyə bilərsiniz?
- Gələn il Azərbaycanda paralimpiya hərəkatının 20 illiyi qeyd ediləcək. Ötən müddətdə bir çox uğura nail olmuşuq, habelə ölkəmizdə bu hərəkatın tanınmasına nail ola bilmişik. 1996-cı ildə Azərbaycan Milli Paralimpiya Komitəsi təsis olunan zaman digər ölkələrdə əlil idmanı haqqında təsəvvür belə yox idi. Həmin vaxt bizim 1-2 idmançımız var idi. Hazırda atletlərin sayı minlərlədir.
Paralimpiya hərəkatı təkcə Bakını deyil, regionları da əhatə edir. Əksər titullu idmançılarımız məhz bölgələrin yetirmələridir. Bunu da nailiyyət kimi dəyərləndirmək olar. Paralimpiyaya idmanın 19 növü daxildir ki, ölkəmizdə onlardan 15-i üzrə idmançılar fəaliyyət göstərirlər. Azərbaycan atletləri yeddi növ üzrə Paralimpiya Oyunlarına qatılırlar. Təbii ki, bu nailiyyətlərin əsasında ölkədə həyata keçirilən uğurlu idman siyasəti dayanır. Dövlətimizin başçısı, Milli Olimpiya Komitəsinin prezidenti İlham Əliyev ölkədə idmanın inkişafını daim diqqətdə saxlayır və atletlərimiz həmişə dövlət qayğısını hiss edirlər. Bu diqqət və qayğı paralimpiyaçılara da şamil olunur.
Hazırda bizim ikiqat paralimpiya çempionlarımız var. Bunlar İlham Zəkiyev və Oleq Panyutindir. Komandamızın heyətində Avropa, dünya çempionları və digər mötəbər yarışların qalibləri var. İdmançılarımız üçün bütün şərait yaradılıb. Belə ki, onların məişət şəraiti yaxşılaşdırılıb, mənzillərlə təmin olunub, idmanla rahat məşğul olmaları üçün bütün imkanlar səfərbər edilib. Azərbaycanda fəaliyyət göstərən Paralimpiya İdman Kompleksi isə digər ölkələrə nümunə göstərilə bilər. Çünki yalnız Azərbaycanda belə bir idman obyekti mövcuddur.
- Azərbaycan Milli Paralimpiya Komitəsinin birinci Avropa Oyunlarına hazırlığı barədə nə deyə bilərsiniz? Paralimpiyaçılarımızın hazırlığı nə səviyyədədir və qarşıya qoyulan hədəflər nələrdir?
- Birinci Avropa Oyunlarının Azərbaycanda təşkil olunması tarixi hadisədir. Məhz bu Oyunlar çərçivəsində paralimpiyaçı cüdoçular da birincilik uğrunda mübarizə aparacaqlar. Biz bunun üçün Azərbaycanın birinci xanımı, birinci Avropa Oyunları Təşkilat Komitəsinin sədri Mehriban Əliyevaya təşəkkürümüzü bildiririk. Məhz Mehriban Əliyevanın təşəbbüsü ilə əlil idmanı mötəbər yarışın proqramına salınıb.
Çox sevindirici haldır ki, “Bakı-2015”-in Məşəl estafetində paralimpiyaçılar da iştirak edirlər. Paralimpiyaçı cüdoçular arasında yarışlar iki çəki dərəcəsində təşkil olunacaq. Qadınlar 57, kişi atletlər isə 100 kiloqramdan yuxarı çəki dərəcəsində medallar uğrunda yarışacaqlar. Hər çəki dərəcəsində Avropanın ən güclü 8 idmançısı çıxış edəcək. Yarışda Azərbaycan ilə yanaşı, Rusiya, Ukrayna, Fransa, Türkiyə, Macarıstan, İspaniya, Almaniya, İngiltərə və Yunanıstandan olan paralimpiyaçılar tatami üzərinə çıxacaqlar. Qadınların yarışında Azərbaycanı dünya çempionatının gümüş mükafatçısı Səbinə Abdullayeva, kişilərin mübarizəsində isə ikiqat paralimpiya çempionu İlham Zəkiyev və Zakir Müslümov təmsil edəcək.
“Bakı-2015”-in proqramına əsasən paralimpiyaçılar arasında yarışlar iyunun 26-da keçiriləcək. İdmançıların “Bakı-2015”-ə ciddi hazırlaşmaları üçün hər cür şərait yaradılıb. Biz onların qarşısına qızıl medal qazanmaq vəzifəsini qoymuşuq. Səbinə Abdullayeva respublikamızda təşkil olunan təlim-məşq toplanışından əlavə Gürcüstanda, İlham Zəkiyev isə Yaponiyada və Türkiyədə hazırlıq keçib. İlham Zəkiyevin çəkisi bir az artıq olduğu üçün o, əsas Olimpiya komandamız ilə birgə hazırlıq keçib. Baş məşqçi İbrahim İbrahimovun məlumatına görə, idmançılarımız “Bakı-2015”-ə tam hazırdırlar.
-“Bakı-2015” birinci Avropa Oyunlarında mübarizə aparacaq paralimpiyaçılarımızın rəqibləri haqqında nə deyə bilərsiniz?
- Cüdoçularımızın rəqibləri çox güclüdür. Səbinə Abdullayevanın əsas rəqibi ukraynalı dünya çempionudur. Səbinə mundialda məhz ukraynalı idmançıya məğlub olaraq gümüş medalla kifayətlənmişdi. Almaniyalı cüdoçunu da favoritlərdən hesab etmək olar. Kişilərin mübarizəsinə gəldikdə isə İlham Zəkiyev qızıl medala əsas iddialıdır. Cüdoçumuz təcrübə baxımından da digərlərindən üstündür. Rusiyalı, ukraynalı və fransalı cüdoçuları da güclü hesab edirəm. Cüdoçularımız da rəqiblərinin görüşlərini izləyir və öz məşqlərini bunun üzərində qururlar.
- Beynəlxalq Paralimpiya Komitəsinin rəsmiləri “Bakı-2015”-ə qonaq qismində qatılacaqlarmı?
- Beynəlxalq Paralimpiya Komitəsinin prezidenti Fill Kraven iyunun 25-də Azərbaycana gələcək. Fill Kravenin səfərinin məqsədi “Bakı-2015” birinci Avropa Oyunlarında iştirak edəcək paralimpiyaçı cüdoçuların yarışlarını izləməkdir. Onu Beynəlxalq Paralimpiya Komitəsinin vitse-prezidenti, Braziliya Milli Paralimpiya Komitəsinin prezidenti Endrü Parsons və Britaniya Paralimpiya Assosiasiyasının fəxri vitse-prezidenti Toni Seynsburi müşayiət edəcəklər. İyunun 29-dək davam edəcək səfər çərçivəsində qonaqlar Azərbaycan Milli Paralimpiya Komitəsinin fəaliyyəti ilə tanış olmaqla yanaşı, bir sıra rəsmi görüşlər də keçirəcəklər.
- Azərbaycan Milli Paralimpiya Komitəsinin gələcək planları və qarşıdakı turnirlər barədə nə deyə bilərsiniz?
- Artıq iki cüdoçumuz “Rio-2016” Paralimpiya Oyunlarına lisenziya qazanıb. Onlar dünya çempionatının qızıl medalını qazanmaqla Paralimpiya Oyunlarına vəsiqəni birbaşa təmin ediblər. Azərbaycan “London-2012” Paralimpiya Oyunlarında 21 idmançı ilə təmsil olunmuşdu. Ancaq gələn il Braziliyada təşkil olunacaq mötəbər yarışa daha çox idmançı ilə qatılmağı qarşıya məqsəd qoymuşuq. Azərbaycan tarixində ilk dəfə voleybol milli komandamızın Paralimpiya Oyunlarında iştirak etmək şansı var. Belə ki, Azərbaycan, Rusiya və Serbiya yığmaları arasında təşkil olunacaq turnirin qalibi bu lisenziyanı qazanacaq. Millimiz bu sınağa çox ciddi hazırlaşır. Qalib gələcəyimiz təqdirdə ilk dəfə komanda idman növündə Paralimpiya Oyunlarında iştirak edəcəyik. “Rio-2016” Paralimpiya Oyunlarında ən az 6 qızıl medal qazanmağı hədəfləyirik. Ümid edirəm ki, buna nail olub xalqımızı sevindirəcəyik.