CƏMİYYƏT
İmişli regional ədliyyə idarəsində insan hüquq və azadlıqları mövzusunda tədbir keçirilib
Bakı, 10 iyun, AZƏRTAC
Ədliyyə Nazirliyinin İmişli regional ədliyyə idarəsinin təşkilatçılığı ilə idarənin əməkdaşlarının, bölgə üzrə yerli ədliyyə qurumlarının əməkdaşlarının və bələdiyyə nümayəndələrinin iştirakı ilə insan hüquq və azadlıqları mövzusunda tədbir keçirilib.
İmişli regional ədliyyə idarəsindən AZƏRTAC-a bildiriblər ki, tədbirdə çıxış edən idarənin rəisi Hakim Məmmədov ümummilli liderimiz Heydər Əliyev tərəfindən 1998-ci il iyunun 18-də Azərbaycan Respublikasında ilk “İnsan hüquqlarının müdafiəsinə dair Dövlət Proqramı”nın təsdiq edildiyini və insan hüquqlarının təmin olunmasının dövlət siyasətinin əsas istiqamətlərindən biri kimi müəyyən edildiyini vurğulayıb. H.Məmmədov Prezident İlham Əliyevin Azərbaycan Respublikasında İnsan Hüquqları Gününün təsis edilməsi haqqında 2007-ci il 18 iyun tarixli Sərəncamı ilə hər il iyunun 18-nin Azərbaycan Respublikasında İnsan Hüquqları Günü kimi qeyd edildiyini vurğulayıb. O, Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının insan hüquq və azadlıqlarının müdafiəsinin səmərəliliyinin artırılması, cəmiyyətdə hüquq mədəniyyətinin inkişaf etdirilməsi, normativ hüquqi bazanın və hüquq müdafiəsi sisteminin təkmilləşdirilməsi istiqamətində tədbirlərin davamlılığının təmin olunması məqsədilə təsdiq edildiyini diqqətə çatdırıb.
H.Məmmədov bildirib ki, multikulturalizm və tolerantlıq tarixən azərbaycanlıların həyat tərzi olub, milli kimliyindən, dilindən, dinindən asılı olmayaraq, Azərbaycan dövlətinin hər bir vətəndaşının gündəlik həyat tərzinə çevrilib. Azərbaycan xalqının zəngin multikultural keçmişi təkcə xalqımızın bugünkü tolerant yaşam tərzi ilə deyil, həm də yaratmış olduğu ədəbi-bədii, elmi-fəlsəfi, siyasi-hüquqi qaynaqlarda, sənədlərdə yaşayır.
İmişli regional ədliyyə idarəsinin əməkdaşı İlkin Savalan multikulturalizm haqqında tədbir iştirakçılarına ümumi məlumat verib.
Sonra Saatlı rayon icra şöbəsinin rəisi Aydın İsmayılov, Füzuli rayon icra şöbəsinin icra məmuru Həkimi Atakişiyev, İmişli qeydiyyat şöbəsinin rəisi Səfa Baxış, İmişli rayon icra şöbəsinin icra məmuru İlqar Quliyev və İmişli rayonu Məzrəli bələdiyyəsinin sədri Babək Kazımov mövzu ətrafında çıxış edərək fikirlərini bildiriblər.