REGİONLAR
İmişlidə təhsil işçilərinin ənənəvi sentyabr konfransı keçirilib
İmişli, 2 sentyabr, Mahir Babayev, AZƏRTAC
Sentyabrın 2-də İmişli rayon təhsil işçilərinin ənənəvi sentyabr konfransı keçirilib.
AZƏRTAC xəbər verir ki, yeni tədris ilində rayonun ümumtəhsil məktəblərində 15 minə yaxın şagird oxuyacaq və onların təlim-tərbiyəsi ilə 1690 müəllim məşğul olacaq. Müəllimlərdən 1295 nəfəri ali, 365 nəfəri orta ixtisas, 30 nəfəri isə ümumi orta təhsillidir. Rayon üzrə müəllimlərin 1050 nəfərini və ya 62 faizini qadınlar təşkil edir. Ümumtəhsil məktəblərində çalışan müəllimlərdən 8 nəfəri Əməkdar Müəllim fəxri adına, 6 nəfəri “Tərəqqi” medalına, 15 nəfəri isə “Qabaqcıl təhsil işçisi” döş nişanına layiq görülüb.
Konfransda, həmçinin məlumat verilib ki, rayondakı 57 təhsil ocağının hamısında cari təmir işləri aparılıb, səliqə-sahman yaradılıb. Parta, yazı taxtası, əyani vəsait və digər avadanlıqlar alınaraq məktəblərə paylanılıb.
Diqqətə çatdırılıb ki, 2014-2015-ci tədris ilində rayon üzrə tam orta təhsilini başa vurmuş 1196 nəfər məzundan 480 nəfəri ali məktəblərə qəbul imtahanlarında iştirak edib, onlardan 257 nəfəri tələbə adını qazanıb. Abituriyentlərin 22 nəfəri 500-dən, 12 nəfəri isə 600-dən yuxarı bal toplayıb.
Rayon icra hakimiyyətinin başçısı Vilyam Hacıyev konfransda çıxış edərək, müəllimləri yeni dərs ili başlanması münasibətilə təbrik edib, onlara uğurlar arzulayıb. Təhsilin inkişaf etdirilərək beynəlxalq standartlara uyğunlaşdırılması ilə bağlı həyata keçirilən dövlət siyasətinin real nəticələrindən danışan natiq İmişlidə bu istiqamətdə görülən işlər barədə məlumat verib. Bildirilib ki, son üç il ərzində rayonda 180 şagird yerlik Xoşçobanlı, 360 şagird yerlik Buludlu, 360 yerlik Sarıxanlı kənd 1 saylı, 624 şagird yerlik Cəfərli kənd 1 saylı, 192 şagird yerlik Cavadxanlı kənd tam orta məktəbləri, eləcə də 1080 şagird yerlik İmişli şəhər 5 saylı məktəb-liseyi əsalı təmir edilərək müəllim və şagird kollektivlərinin istifadəsinə verilib. Bundan əlavə, 120 şagird yerlik Cəfərli kənd 2 saylı və 180 yerlik Ölcələr kənd tam orta məktəbləri, eyni zamanda, 40 yerlik Məzrəli kənd uşaq bağçası üçün yeni binalar tikilib. Hazırda İmişli şəhərinin mərkəzində müasir tələblərə cavab verən 100 yerlik iki uşaq bağçası üçün binaların tikintisi davam etdirilir.
Sonda qəbul imtahanlarında 600-dən yuxarı bal toplayan tələbələrə televizor hədiyyə olunub və Fəxri fərmanlar verilib.