Quba, 5 may, Elxan Yusifli, AZƏRTAC

Mayın 5-də Siyəzən rayonunda “Ərzaq məhsullarının tədarükü və təchizatı” Açıq Səhmdar Cəmiyyəti tərəfindən 13 istehsalçıya 265 min 500 manat avans verilib.

AZƏRTAC xəbər verir ki, bu günədək respublikanın bütün bölgələrini əhatə etməklə 93 nəfər fermerə verilən avansın məbləği 2 milyon 499 min 968 manata çatıb.

Avansların təqdimatı Siyəzən rayonunun Kolanı kəndində açıq tarla şəraitində həyata keçirilib.

“Ərzaq məhsullarının tədarükü və təchizatı” ASC idarə heyətinin sədr müavini Elşən Əsədov bildirib ki, həftə ərzində istehsalçılara avans verilməsinin növbəti mərhələsi reallaşıb. Mayın 2-də Tovuz, Qazax, Şəmkir və Gədəbəy rayonlarından olan 18 fermerə 90 min 861 manat məbləğində avans təqdim olunub. Həmin vəsait kartof, yerkökü, çuğundur məhsulları istehsalının artırılması məqsədi ilə verilib. Ertəsi gün isə Yevlaxda keçirilən tədbirdə bu bölgədə və ətraf rayonlarda fəaliyyət göstərən 20 istehsalçıya 197 min 500 manat vəsait ödənib. Ağcabədi, Ağdam, Ağdaş, Bərdə, Cəlilabad, Yevlax, Qax, Zərdab, Neftçala, Saatlı, İmişli və Zaqataladan olan fermerlər bu vəsait hesabına idxalı əvəzləyən məhsullar yetişdirəcəklər.

Elşən Əsədov dövlətimizin başçısının tapşırığı ilə həyata keçirilən prosesin iqtisadi əhəmiyyəti haqda danışaraq, fermerləri vəsaitdən düzgün istifadə etməyə çağırıb. Bildirilib ki, veriləcək avansların ümumi məbləği hər bir kənd təsərrüfatı məhsulu üçün kiçik, orta və böyük istehsalçı kateqoriyaları üzrə ayrı-ayrılıqda tənzimlənir. Avansların həcmi kiçik istehsalçılar üzrə 3 min manata, orta səviyyəli istehsalçılar üzrə 50 min manata və böyük istehsalçılar üzrə isə 250 min manata qədərdir. Bir istehsalçıya bir neçə məhsul üçün avans ödənişi edilə bilər. Lakin ümumi avans məbləği böyük istehsalçılar üzrə nəzərdə tutulmuş maksimum həddən artıq ola bilməz.

Avans alan fermerlər çıxış edərək vəsaitin verilməsini dövlətin aqrar sahəyə dəstəyi kimi qiymətləndiriblər.

Tədbirin sonunda iştirakçılar avans təqdim olunan təsərrüfatçıların əkin sahəsinə baxış keçiriliblər.