SİYASƏT
İndoneziyalı deputat: Azərbaycan ilə əlaqələrimizə böyük önəm veririk
Bakı, 22 fevral, AZƏRTAC
Fevralın 22-də Milli Məclis sədrinin birinci müavini Ziyafət Əsgərov İndoneziya parlamenti Nümayəndələr Palatasının üzvləri ilə görüşüb.
AZƏRTAC xəbər verir ki, Ziyafət Əsgərov Azərbaycan ilə İndoneziya arasında siyasi, iqtisadi, ticarət və digər sahələrdə əlaqələrin inkişafının yüksək səviyyədə olduğunu bildirib.
Ölkələrimiz arasında əməkdaşlığın dərinləşdirilməsi üçün yaxşı potensialın olduğunu vurğulayan Milli Məclis sədrinin birinci müavini qeyd edib ki, həm İndoneziya, həm də Azərbaycan tərəfindən müxtəlif sahələrə dair müqavilələr hazırlanır, müəyyən müqavilələr isə imzalanıb. Hazırda İndoneziyada 21, Azərbaycanda isə 9 müqaviləyə baxılır. Azərbaycan İndoneziya ilə münasibətlərin inkişafına önəm verir.
Azərbaycanın multikultural ənənələrə malik ölkə olduğunu deyən Milli Məclis sədrinin birinci müavini bildirib ki, Azərbaycan Avropa ilə Asiyanın qovşağında yerləşir və burada müxtəlif millətlərin nümayəndələri birgə yaşayırlar. Ölkəmizin təşəbbüsü ilə bir sıra qlobal layihələrin həyata keçirildiyini deyən Ziyafət Əsgərov “İpək yolu” layihəsi reallaşandan sonra İndoneziyanın da bundan yararlanacağına ümid etdiyini vurğulayıb.
Ermənistanın Azərbaycana qarşı təcavüzkar siyasətindən danışan Z.Əsgərov Dağlıq Qarabağ məsələsinin ölkəmizin ən ağır problemi olduğunu bildirib. “25 ildir Azərbaycan torpaqlarının 20 faizi işğala məruz qalıb, BMT Təhlükəsizlik Şurasının bununla bağlı imzaladığı 4 qətnamə hələ də icra edilməyib. Bu məsələ İslam Əməkdaşlıq Təşkilatında da dəfələrlə müzakirə olunub və Ermənistanın işğalçılıq siyasəti pislənib”,- deyə Ziyafət Əsgərov vurğulayıb.
İslam dünyası ölkələri arasında həmrəyliyin olmasının vacibliyini bildirən parlament sədrinin birinci müavini deyib ki, bu il Prezident İlham Əliyevin Sərəncamı ilə 2017-ci il Azərbaycanda “İslam Həmrəyliyi İli” elan olunub. Bu il Azərbaycanda IV İslam Həmrəyliyi Oyunları keçiriləcək.
İndoneziya parlamenti Nümayəndələr Palatasının üzvlərindən ibarət nümayəndə heyətinin rəhbəri xanım Meutya Viada Hafid ölkələrimiz arasında mövcud olan dostluq münasibətlərindən məmnunluğunu ifadə edib. Qeyd edib ki, həm Azərbaycan, həm də İndoneziya multikultural ölkələrdir. İndoneziya ictimaiyyətinin Dağlıq Qarabağ münaqişəsi və Xocalı faciəsi barədə məlumatlı olduğunu bildirən Meutya Viada Hafid ölkəsinin bu işğalı pislədiyini ifadə edib. O, tezliklə münaqişənin ədalətli həllinə ümid etdiklərini də qeyd edib.
“Azərbaycan ilə əlaqələrimizə çox böyük önəm veririk. Çünki hər iki ölkə İslam ölkəsidir. Hər iki ölkənin əlaqələrinin genişləndirmək imkanları var. Biz bunun üçün əlimizdən gələni edəcəyik”, - deyə qonaq bildirib.