Lənkəran, 25 may, Bağır Əliyev, AZƏRTAC

Lənkəran Dövlət Universitetində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının, Daxili İşlər Nazirliyinin İnsan Alverinə Qarşı Mübarizə Baş İdarəsinin və “XXI əsrin qadınları” İctimai Birliyinin birgə təşkilatçılığı ilə Azərbaycan Respublikası Prezidentinin Sərəncamı ilə təsdiq olunmuş "Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı"nın icrası ilə bağlı maarifləndirici tədbir keçirilib.

AZƏRTAC xəbər verir ki, tədbirdə çıxış edən Daxili İşlər Nazirliyinin İnsan Alverinə Qarşı Mübarizə Baş İdarəsinin əməkdaşı, polis polkovnik-leytenantı Füzuli Qurbanov insan alveri, fəsadları və ona qarşı aparılan mübarizənin hüquqi aspektləri ilə bağlı geniş məlumat verib. O, bu məlumatların hər birimiz üçün faydalı olacağına əminliyini ifadə edərək tələbələri yaxşı oxumaqla yanaşı, hüquqlarını da dərindən bilməyə çağırıb.

İnsan alverinə qarşı mübarizə üzrə Qeyri-Hökumət Təşkilatları Koalisiyasının cənub bölgəsi üzrə əlaqələndiricisi, “Hüquqi Yardım” İctimai Birliyinin sədri İlqar Qasımov bildirib ki, insan alveri dedikdə güc tətbiq etmə, hədələmə, məcbur etmə, oğurlama, dələduzluq, aldatma, hakimiyyətdən, vəzifədən sui istifadə etməklə insan hüquq və azadlıqlarının pozulması, insanların aldadılaraq istismara cəlb edilməsi, daşınması, təhvil verilməsi və ya alınması başa düşülür. O, bu tipli hallarla rastlaşdıqda dərhal “152” nömrəli qaynar xətt telefonuna zəng etməyi tövsiyə edib.

"XXI əsrin qadınları" İctimai Birliyinin sədri Mahirə Əmirhüseynova Birliyin əsas məqsədi haqqında qısa məlumat verərək, qadınlara kömək məqsədilə [email protected] qaynar xəttinin fəaliyyət göstərdiyini bildirib.

Tədbirin sonunda tələbələri maraqlandıran suallar cavablandırılıb.