DÜNYA
İnsanlar sizə pul kisələrini verərlər, amma mobil telefonlarını yox VİDEO
Vaşinqtonda ABŞ-ın Beynəlxalq Yayım Şurası “Media brendlərinə loyallığın sirri. Jurnalistika rəqəmsal texnologiyalar dövründə” mövzusunda “dəyirmi masa” keçirib.
Tədbirdə Emmi və “Qolden Qloub” mükafatı laureatı Ben Silverman, “Pepsi-Co” şirkətinin departament rəhbəri Frenk Kuper, rejissor və “Warrior Poets Production” şirkətinin prezidenti Morqan Sperlok, “Starfish Media Group” şirkətinin yaradıcısı və prezidenti, CNN televiziya şirkətinin tanınmış jurnalisti və üç Emmi mükafatı laureatı Soledad O`Brayen, “Endemol North America” media şirkətinin həmsədri Çarli Korvin və “National Geographic” kanalının keçmiş prezidenti Hovard Tomas Ouens çıxış ediblər. Panelçilər tədbirin iştirakçılarına yeni rəqəmsal texnologiyalar və bütün dünyada sosial şəbəkələrin inkişafı dövründə müxtəlif ölkələrdə müxtəlif auditoriyalara filmlərin təqdim edilməsi sahəsində öz strategiyalarından danışıblar.
Rejissor Morqan Sperlok Amerikanın sosial problemlərini əks etdirmək üçün öz sənədli filmlərində yumordan istifadə olunmasının əhəmiyyətini qeyd edərək bildirib ki, bu, ən ağır sosial məsələlərin qavranmasını və müzakirəsini asanlaşdırır.
Tanınmış jurnalist Soledad O`Brayen də öz növbəsində, qeyd edib ki, onun sənədli filmlərində bəhs olunan insanlarla, tamaşaçıların şəxsi təcrübəsi ilə əlaqə son dərəcə zəruridir. Buna görə də onun bir çox filmləri məhz tamaşaçıların qarşılaşdıqları sosial problemləri əks etdirir.
“Pepsi” şirkətinin nümayəndəsi Frenk Kuper qeyd edib ki, bu gün mobil telefon istifadəçilərinin sayı 5,5 milyard nəfər təşkil edir ki, bu da informasiyanın geniş auditoriyalara çatdırılması formatını əsaslı surətdə dəyişir. F.Kuper deyib: “Mobil telefonlar insanların həyatında ən mühüm şəxsi alətə çevrilib. İnsanlar öz pul kisələrini sizə verərlər, amma mobil telefonlarını yox”.
Bütün panelçilər bildiriblər ki, sosial şəbəkələrdən istifadə edərək auditoriya ilə dialoq yaratmaq və onu qorumaq son dərəcə vacibdir, çünki “Facebook” və “Twitter” kimi mühitdə tamaşaçı və informasiya istehlakçısı ilə informasiyanı təqdim edən arasında dialoq yaranır. Həmçinin başqa ölkələrdə onların mədəni normalarına və ənənələrinə uyğun olaraq təqdim olunan informasiyanın lokallaşdırılmasının da vacib olduğu qeyd edilib.
ABŞ-ın Beynəlxalq Yayım Şurası Amerika hökumətinin sponsorluq etdiyi bütün beynəlxalq kütləvi informasiya vasitələrinə rəhbərlik edən müstəqil federal agentlikdir. Bunların sırasına “Amerikanın səsi”, “Azadlıq” radioları, Yaxın Şərq Yayım Şəbəkəsi, o cümlədən “Alhurra TV” və “Sava radiosu”, “Azad Asiya” radiosu, Kuba Yayım ofisi daxildir.
Yusif Babanlı
AZƏRTAC-ın xüsusi müxbiri
Vaşinqton