ELM VƏ TƏHSİL
İnternat məktəbində “Beynəlxalq ailə günü”
Bakı, 18 may, P.İmanova, AZƏRTAC
Mayın 18-də Təhsil Nazirliyinin təşkilatçılığı ilə Bilgəh qəsəbəsindəki 11 nömrəli İnteqrasiya təlimli internat məktəbində Beynəlxalq Ailə Gününə həsr olunan tədbir keçirilib.
AZƏRTAC xəbər verir ki, mərasimdə Azərbaycan Dövlət Rəssamlıq Akademiyasının nəzdində İncəsənət Kollecinin könüllü tələbələri uşaqlarla birlikdə “Bakı 2017” IV İslam Həmrəyliyi Oyunlarına həsr olunan rəsmlər çəkiblər. 10 nömrəli Sanatoriya tipli, 11 nömrəli İnteqrasiya təlimli və valideyn himayəsindən məhrum olan uşaqlar üçün 1 nömrəli internat məktəblərinin şagird kollektivi tələbələrlə birgə həyətyanı sahədə güllər əkiblər.
İnternat məktəbinin direktoru Gülnarə Abdullayeva tədbirin ümummilli lider Heydər Əliyevin anadan olmasının 94-cü ildönümünə və Beynəlxalq Ailə Gününə həsr edildiyini söyləyib. Bildirilib ki, hər il internat məktəbində Beynəlxalq Ailə Günü qeyd olunur. Sabunçu rayonunda üç internat məktəbinin fəaliyyət göstərdiyini söyləyən direktor deyib ki, bugünkü tədbirdə həmin müəssisələrdə mayda anadan olan 41 şagirdin doğum günü qeyd ediləcək.
G.Abdullayeva bildirib ki, 1961-ci ildən fəaliyyət göstərən internat məktəbinin bu il martın 1-də yenidənqurmadan sonra açılışı olub. Burada şagirdlərin yüksək səviyyədə təlim-tərbiyə almaları üçün dövlətimiz tərəfindən lazımi şərait yaradılıb.
Sonra media nümayəndələri internat məktəbi ilə tanış olublar. Qonaqlara məlumat verilib ki, məktəb 2016-cı ildə Təhsil Nazirliyi tərəfindən əsaslı təmir edilib. Hazırda internat məktəbində 1.108 şagird təlim-tərbiyə alır. Ümumtəhsil siniflərində 796, xüsusi siniflərdə isə 163 şagird təhsil alır. Onların təlim-tərbiyəsi ilə 142 pedaqoji işçi məşğul olur.
Ötən tədris ilində internat məktəbini bitirən 39 məzundan 10-u sağlamlıq imkanları məhdud şagirddir. Ümumtəhsil siniflərindən məzun olan 29 şagirddən doqquzu ali təhsil müəssisələrinə, bir nəfəri kollecə qəbul olunub.