İQTİSADİYYAT
İqtisadi İslahatların Təhlili və Kommunikasiya Mərkəzi ilə ISESCO arasında anlaşma memorandumu imzalanıb
Bakı, 6 may, AZƏRTAC
Mayın 6-da Azərbaycan Respublikası İqtisadi İslahatların Təhlili və Kommunikasiya Mərkəzi (İİTKM) və İslam Təhsil, Elm və Mədəniyyət Təşkilatı (ISESCO) arasında Azərbaycanın Rəqəmsal Ticarət Qovşağı kimi tanınmasına dair anlaşma memorandumu imzalanıb.
AZƏRTAC xəbər verir ki, sənədi İİTKM-nin icraçı direktoru Vüsal Qasımlı və ISESCO-nun baş direktoru Əbdüləziz bin Osman əl-Tuveycri imzalayıb.
İİTKM-nin icraçı direktoru Vüsal Qasımlı qeyd edib ki, tərəflər arasında imzalanan anlaşma memorandumu Azərbaycanın Rəqəmsal Ticarət Qovşağı kimi mövqeyinin gücləndirilməsi, xarici ticarət əməliyyatlarının genişləndirilməsinə və tranzaksiyaların artmasına kömək edəcək. Belə bir qovşağın yaradılması xüsusi ilə islam ölkələrində elektron imzaların qarşılıqlı tanınması baxımından önəmlidir. Mərkəz ilə ISESCO arasında imzalanan bu memorandum Azərbaycanın İslam dünyasında rəqəmsallaşdırma sahəsində öncül yerlərdə mövqelərinin daha da gücləndirilməsinə imkan yaradacaq.
V.Qasımlı, həmçinin vurğulayıb ki, Azərbaycan Prezident İlham Əliyevin rəhbərliyi ilə Rəqəmsal Ticarət Qovşağına çevrilməklə nəinki islam ölkələri, həm də dünya üçün də yaxşı bir nümunə göstərir. Anlaşma memorandumunun Bakıda keçiriləcək IV İslam Həmrəyliyi Oyunları ərəfəsində və IV Ümumdünya Mədəniyyətlərarası Dialoq Forumu zamanı imzalanması xüsusi önəm daşıyır. Bu əməkdaşlıq sənədi bir tərəfdən Azərbaycanın islam həmrəyliyinə, digər tərəfdən isə mədəniyyətlərarası dialoqa verdiyi önəmli töhfədir.
ISESCO-nun baş direktoru Əbdüləziz bin Osman əl-Tuveycri rəhbərlik etdiyi təşkilatın Azərbaycanla əməkdaşlıqdan şərəf duyduğunu diqqətə çatdırıb. Onun sözlərinə görə, Azərbaycan rəqəmsal texnologiyalarının düzgün tətbiqi sahəsində nəinki region ölkələri, o cümlədən beynəlxalq səviyyədə bir modelə çevrilib.
ISESCO-nun baş direktoru ilk dəfə Bakını 2005-ci ildə ziyarət etdiyini və ölkəmizin sürətli inkişafının şahidi olduğunu söyləyib. Baş direktor Azərbaycanın növbəti illərdə də davamlı və dinamik inkişaf edəcəyinə və bunun üçün bütün iqtisadi resurslara malik olduğunu vurğulayıb.