İQTİSADİYYAT


İqtisadi İslahatların Təhlili və Kommunikasiya Mərkəzinin azexport.az portalı təqdim olunub [YENİLƏNİB]

Bakı, 20 dekabr, AZƏRTAC

Dekabrın 20-də “ADA” Universitetində və İqtisadi İslahatların Təhlili və Kommunikasiya Mərkəzi tərəfindən yaradılan azexport.az portalının "AmCham"ın dəstəyi ilə təqdimatı keçirilib.

AZƏRTAC xəbər verir ki, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib ki, portalın missiyası Azərbaycan mənşəli mallar haqqında məlumatların təqdim edilməsi və onların daxili və xarici bazarlarda satışı üçün əlverişli platforma yaradılmasıdır. Portal dünyanın ən populyar elektron satış şəbəkələri ilə inteqrasiya olunaraq Azərbaycan mallarını dünyaya sərgiləyir. Dünyanın və Azərbaycanın aparıcı nəqliyyat-logistika şirkətləri və ödəmə sistemləri Azərbaycan mallarının realizasiyası üçün əlverişli şəkildə azexport.az-a inteqrasiya olunublar. Mütəmadi yenilənən, istifadəyə rahat, əlçatan, təhlükəsiz, sürətli, əlverişli olan azexport.az vasitəsilə “Made in Azerbaijan” brendi alıcılara yaxınlaşdırılır.

Sonra azexport.az portalının meneceri Zaur Qardaşov portalın mahiyyəti və imkanları barədə təqdimat edib. Portalın funksionallığı, Azərbaycan istehsalçıları barədə vahid məlumat bazasının işləmə prinsipi, eyni zamanda, portalın ixracatçılara təklif etdiyi əlavə imkanlardan bəhs edilib. Zaur Qardaşov, həmçinin portala inteqrasiya olunmuş milli və beynəlxalq ödəniş sistemləri, nəqliyyat və logistika xidmətləri, real rejimdə tərcümə xidməti və Azərbaycan məhsullarının beynəlxalq ticarət platformalarında yerləşdirmə imkanları barədə də məlumat verib.

Milli Məclisin iqtisadi siyasət, sənaye və sahibkarlıq komitəsinin sədri Ziyad Səmədzadə Azərbaycanda ixracın genişlənməsi istiqamətində azexport.az saytının imkanlarını yüksək qiymətləndirərək, verəcəyi töhfələrdən bəhs edib. Sahibkarlığın inkişafının yeni iqtisadi siyasətin əsas istiqamətlərindən biri olduğunu vurğulayan komitə sədri deyib ki, cari ilin əvvəlindən uğurla reallaşan islahatların əsas prioritetlərindən biri məhz ixracın genişləndirilməsi, Azərbaycan brendi ilə qeyri-neft məhsullarının istehsalının və xarici ölkələrə satılmasının təşviqidir.

“Dövlət başçısının tapşırıqlarına uyğun olaraq, rəqabətqabiliyyətli və ixracyönümlü yerli məhsulların xarici bazarlarda “Made in Azerbaijan” brendi adı altında təşviqi istiqamətində aidiyyəti dövlət qurumları tərəfindən kompleks tədbirlər görülür. azexport.az saytı da bu baxımdan əhəmiyyətli missiya həyata keçirəcək”, - deyə Z.Səmədzadə qeyd edib.

“Azərbaycanın kənd təsərrüfatı sahəsində ixrac potensialı son 15 ildə 5 dəfə, son 10 ildə 56 faiz, son 5 ildə isə 30 faiz artıb. Azərbaycanın kənd təsərrüfatı sahəsində ixrac potensialının təxminən 90 faizi qonşu Rusiya bazarının payına düşür. Burada əsas arqument kimi Azərbaycanın istehsal etdiyi məhsulların keyfiyyət amilini xüsusi vurğulamaq lazımdır. Ötən ilin sonu bu ilin əvvəlində FAO ilə birgə apardığımız araşdırma göstərdi ki, Azərbaycanda kənd təsərrüfatı sahəsində ixracpotensiallı 110 sahibkar fəaliyyət göstərir. Çox təəssüf ki, bu sahibkarlardan təxminən 6-nın ixrac imkanları 50 faizdən yüksəkdir. Təxminən 25 sahibkarın ixrac imkanları 90 faiz təşkil edir. Səbəbləri araşdırarkən müəyyən etdik ki, bu, informativ mühitin qənaətbəxş səviyyədə olmaması ilə bağlıdır. Hesab edirəm ki, azexport.az portalının yaradılması məhz bu problemin aradan qaldırılmasında çox ciddi vasitə olacaq”, - deyə kənd təsərrüfatı nazirinin müavini Seyfəddin Talıbov vurğulayıb.

Azərbaycanda Amerika Ticarət Palatasının (“AmCham”) prezidenti İlqar Vəliyev bildirib ki, imkanların daim artan xətt üzrə inkişaf etməsi Azərbaycanda də həyata keçirilən iqtisadi siyasətin əsas istiqamətlərindən birini təşkil edir. azexport.az platforması isə, öz növbəsində, ölkənin ixrac potensialının artırılmasına dəstək verməkdə xüsusi əhəmiyyət kəsb edir. Artıq sahibkarlar öz məhsullarını xarici ölkələrdə seçdiyi bazarlara daha rahat şəkildə çıxara biləcəklər. Adıçəkilən portal, həmçinin “Made in Azerbaijan” brendinin xarici bazarlarda daha da məşhurlaşması üçün əvəzsiz rol oynayacaq. Sahibkarlar isə əvvəlki dövrlərdən fərqli olaraq öz məhsullarını tanıtmaq üçün bir çox əlavə xərclərdən də azad olacaq ki, bu da onlar üçün böyük stimul rolunu oynayacaq. Azərbaycanın onun əsas tərəfdaşları ilə ixrac sahəsində əlaqələr qurmasına yönələn layihə kimi bu portal ölkəmizin ixrac mövqelərini də möhkəmləndirəcək.

Artıq bir neçə ölkədə təmsilçiliklərin mövcud olduğunu deyən “Azərsun Holdinq” Şirkətlər Qrupunun prezidenti Abdolbari Goozal diqqətə çatdırıb ki, azexport.az vasitəsilə yerli məhsulların xarici bazarlara çıxarılması istiqamətində dövlət başçısının yaratdığı imkanlardan faydalanaraq, ixrac potensialının artırılması üçün tədbirlər həyata keçiriləcək. “Azərsun Holdinq” bundan sonra da portalın məhsulların yerləşdirilməsi və tanıdılması, eləcə də məlumat bazasının yenilənməsi kimi yaratdığı fürsətdən maksimum şəkildə faydalanacaq. Biz çox şadıq ki, “Azərsun Holdinq” məhsulları azexport.az vasitəsilə xaricdə təmsil olunacaq”, - deyə A.Goozal bildirib.

“GoldenPay “şirkətinin rəhbəri Fərid İsmayılzadə bildirib ki, Azərbaycanın ən böyük internet şirkəti olaraq belə bir tədbirdə iştirak etmək təmsil etdiyi qurumun strateji hədəflərinə daxildir. F.İsmayılzadə deyib: “Biz azexport.az portalına dəstəyi yalnız iştirakla məhdudlaşdırmaq istəmirik. Onun uğurlu olması üçün təcrübəmizi, texniki və digər imkanları bölüşməyə hazırıq. Hesab edirəm ki, portalın xaricdə tanıdılması xüsusilə vacibdir”.

Sonda azexport.az resursuna aid videoçarx nümayiş etdirilib. Videoçarxda BMT İnkişaf Proqramının mütəxəssisi Goran Sumkovski, Dünya Kiçik və Orta Sahibkarlıq Forumunun direktoru Tunc Uyanık, all.biz alqı-satqı platformasının nümayəndəsi Rüxsarə Ramazanova, alibaba.com Qlobal Partnerinin baş meneceri Fren Chin çıxış edərək, azexport.az portalı ilə əməkdaşlıqlarını qeyd ediblər, eləcə də portalın Azərbaycanda biznesin inkişafına dəstək olacağına əminliklərini ifadə ediblər.

Qeyd edək ki, azexport.az saytı Azərbaycan Respublikasının Prezidenti İlham Əliyevin “Azərbaycan Respublikasında istehsal olunan malların vahid məlumat bazasının yaradılması haqqında” 2016-cı il 21 sentyabr tarixli Sərəncamı əsasında yaradılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.