SİYASƏT
İranın media fəaliyyətinə məsul qurumlarının nümayəndələri ölkəmizdə səfərdədir
Bakı, 10 iyul, AZƏRTAC
İranın media fəaliyyətinə məsul qurumlarının nümayəndələri ölkəmizdə səfərdədir.
Mətbuat Şurasından AZƏRTAC-a bildiriblər ki, İran İslam Respublikasının mədəniyyət və islam irşadı nazirinin mətbuat işləri üzrə müavini Hüseyn İntizaminin rəhbərlik etdiyi nümayəndə heyəti iyulun 10-dan 13-dək Azərbaycanda səfərdə olacaq. Səfər Azərbaycan Mətbuat Şurası ilə İranın sözü gedən dövlət qurumunun Mətbuat və İnformasiya Departamenti arasında ötən ilin noyabrın 9-da imzalanmış Əməkdaşlıq Memorandumu çərçivəsində reallaşdırılır.
Nümayəndə heyətinin tərkibinə H.İntizami ilə yanaşı, Mədəniyyət və İslam İrşadı Nazirliyinin mətbuat işləri üzrə planlama şurasının üzvü Həmidrza Asəfi, xarici KİV-lərlə iş üzrə baş direktor Məhəmməd Cəfər Safi, İranın Xəbər Onlayn Agentliyinin baş redaktoru Cavad Məhacer, İslam Respublikasının Naşravran təşkilatının İdarə Heyətinin üzvü Seyid Cəfər Haşemi və İranın Xarici İşlər Nazirliyinin Media və Ümumi Siyasət idarəsinin rəis müavini Həmid Əhmədi daxildir.
Nümayəndə heyətinin KİV rəhbərləri ilə ümumi toplantısının keçirilməsi, həmçinin ayrı-ayrı redaksiyalarda olmaları, rəsmi şəxslərlə, deputatlarla görüşləri, ölkəmizin tarixi yerlərinə səfərləri nəzərdə tutulub.
Qeyd edək ki, Azərbaycan Mətbuat Şurası ilə İranın Mədəniyyət və İslam İrşadı Nazirliyinin Mətbuat və İnformasiya Departamenti arasında imzalanmış Əməkdaşlıq Memorandumunda hər iki ölkənin jurnalistika ilə əlaqədar qurumlarının nümayəndələrinin, habelə KİV-lərinin təmsilçilərinin qarşılıqlı səfərlərinin təşkili, birgə toplantıların keçirilməsi, təcrübə mübadiləsinin aparılması və s. tədbirlər nəzərdə tutulur.
Onu da bildiririk ki, Əməkdaşlıq Memorandumu çərçivəsində Azərbaycandan da İrana jurnalist səfəri reallaşdırılacaq.