DÜNYA


İraq ordusu Mosuldakı 56 rayondan 40-nı İŞİD-dən azad edib

Bakı, 28 dekabr, AZƏRTAC 

İraq hərbçiləri Mosulun böyük hissəsini İŞİD qruplaşmasının terrorçularından azad edib.

AZƏRTAC xəbər verir ki, bunu RİA Novosti informasiya agentliyinə müsahibəsində İraqın xarici işlər naziri İbrahim əl-Cəəfəri bildirib. “Hazırda Mosulun, habelə onun Naynava vilayətinə daxil olan ətraf ərazilərinin böyük hissəsi azad olunub. Bu, 56 rayondan 40-ı deməkdir”, - deyə nazir bəyan edib.

Hökumət qüvvələri ölkənin ikinci böyük şəhəri olan Mosulun İŞİD qruplaşmasından azad edilməsi istiqamətində əməliyyatlara oktyabrın 17-də başlayıb. Bu şəhər iki ildən çoxdur ki, yaraqlıların nəzarətindədir və qruplaşmanın İraqdakı paytaxtı sayılır. Əməliyyatlarda ordu ilə yanaşı, şiə könüllüləri, kürd döyüşçülərindən ibarət “Peşmərgə” dəstələri iştirak edirlər. Onları İraq Hərbi Hava Qüvvələri və beynəlxalq koalisiyanın aviasiyası dəstəkləyir.

Bu ərəfədə yerli telekanallar İraqın Baş naziri Heydər əl-Abadinin belə bir bəyanatını yaymışdılar ki, ölkə ərazisində fəaliyyət göstərən İŞİD yaraqlılarını tam məhv etmək üçün İraqa üç ay vaxt lazımdır. Suriyada İŞİD-ə qarşı beynəlxalq əməliyyatların komandanı general-leytenant Stiven Taunsend isə bir qədər əvvəl bəyan etmişdi ki, qruplaşmanın bütünlüklə məhv edilməsi azı iki il çəkəcək.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.