İslamabad, 20 yanvar, АZƏRTAC

İslamabad şəhərindəki Preston Universitetində 20 Yanvar faciəsinin 27-ci ildönümü ilə əlaqədar “Qara Yanvar: Şəhidlikdən Azərbaycanın müstəqilliyinə doğru” mövzusunda seminar keçirilib.

Seminarda tanınmış ictimai-siyasi xadimlər, səfirlər və beynəlxalq təşkilatların nümayəndələri, alimlər, mədəniyyət xadimləri, ali məktəblərin rektor və tələbələri, jurnalistlər iştirak ediblər.

Azərbaycanın Pakistandakı səfiri Əli Əlizadə çıxışında deyib ki, SSRİ rəhbərliyinin ermənipərəst siyasətinə, Dağlıq Qarabağın Ermənistana verilməsi cəhdlərinə və Azərbaycanın nəyin bahasına olursa-olsun SSRİ-nin tərkibində saxlanılmasına etiraz edən Azərbaycan xalqına qarşı sovet qoşunları tərəfindən 1990-cı il yanvarın 19-dan 20-nə keçən gecə böyük cinayət törədilib. Bu qanlı cinayət Azərbaycan xalqının əzmini qıra, müstəqilliyə qovuşmasına mane ola bilmədi, xalqımız daha da mətinləşdi, daha da birləşdi, nəhayət, ölkəmiz müstəqilliyini bərpa etdi. Diplomat həmin dövrdə hətta informasiya blokadasında saxlanılan Azərbaycanın haqq səsinin ümummilli lider Heydər Əliyevin etiraz bəyanatları nəticəsində dünya ictimaiyyətinə çatdırıldığını, beynəlxalq ictimaiyyətin diqqətinin bu qətliama cəlb olunduğunu vurğulayıb.

Səfir müstəqilliyini bərpa etdikdən sonra Pakistanın Azərbaycanı ilk tanıyan ölkələrdən biri olduğunu xatırladıb, təcavüzkar Ermənistanı bir dövlət kimi bu günədək tanımadığına görə Pakistan dövlətinə və xalqına təşəkkür edib.

Tanınmış diplomat və siyasi xadim, sabiq xarici işlər naziri Abdul Səttar Azərbaycanın dünyanın qədim mədəniyyətə malik ölkələrindən, eyni zamanda, İslam mədəniyyətinin təmsilçilərindən olduğunu, burada azadlıq ideyalarının həmişə üstün tutulduğunu söyləyib. Bildirib ki, böyük mədəni, elmi və iqtisadi potensiala, müdrik rəhbərlərə malik Azərbaycan xalqı öz azadlığı uğrunda mühüm fədakarlıqlar edib. Natiq 20 Yanvar qırğınının Azərbaycan xalqının azadlıq əzmini qıra bilmədiyini, lakin müstəqilliyini qazanan Azərbaycanın Ermənistanın işğalı ilə üzləşdiyini vurğulayıb. Əlavə edib ki, buna baxmayaraq, uzaqgörən lider Heydər Əliyevin rəhbərliyi altında Azərbaycan regionun və dünyanın ən sabit inkişaf edən ölkələrindən biri olmağı bacardı, həm qonşularla, həm də Şərq və Qərb ölkələri ilə yaxşı münasibətlər yaratdı.

Preston Universitetinin rektoru Abdul Basit 20 Yanvar faciəsinin Azərbaycan tarixində mühüm rol oynadığını, mədəni və iqtisadi ehtiyatlara sahib olan Azərbaycanın gündən-günə dünyada öz mövqeyini möhkəmləndirdiyini qeyd edib.

İslamabadda fəaliyyət göstərən Sülh və Diplomatik Tədqiqatlar İnstitutunun prezidenti Asif Nur 20 Yanvar faciəsinin Azərbaycan siyasi tarixinin önəmli səhifələrindən biri olduğunu, SSRİ rəhbərliyinin təcavüzkarlıq və qəddarlığının Azərbaycan xalqının azadlıq istəyini daha da gücləndirdiyini qeyd edib.

Mərdan Qadınlar Universitetinin professoru Adnan Sərvər yenidənqurma ideyaları ilə humanist görüntü verən Mixail Qorbaçov hakimiyyətinin Azərbaycan xalqının hüquqlarını qan içində boğmağa çalışmasını imperiya siyasətinin bariz təzahürü kimi qiymətləndirib, 150 il ərzində çar Rusiyası və SSRİ-nin tabeliyində yaşamağa məcbur olan Azərbaycan xalqının əsarətlə barışmadığını, sonda azadlığına qovuşduğunu diqqətə çatdırıb.

Mərkəzi Asiya və Qafqaz üzrə ekspert Mahmud-ul-Həsən Xan sabiq SSRİ-nin müstəqillik tələb edən Azərbaycan xalqına qarşı təcavüzündən danışıb, qadınlara, uşaqlara, qocalara aman verilmədiyini diqqətə çatdırıb. O, 20 Yanvar faciəsinin əslində dünya coğrafiyası və tarixinin dəyişməsinə səbəb olduğunu, SSRİ-nin dağılmasını və Azərbaycanın müstəqillik qazanmasını şərtləndirdiyini ifadə edib.

Milli Müdafiə Universitetinin beynəlxalq əlaqələr idarəsinin sabiq müdiri, professor Məhəmməd Xan Azərbaycan xalqının heç zaman əsarəti, yadların siyasi və mədəni hökmranlığını qəbul etmədiyini, özünün mədəniyyətini, dilini və milli mənliyini qoruduğunu, 1918-ci ildə qazandığı müstəqilliyini yenidən əldə etmək üçün mübarizəsini davam etdirdiyini, Sovet İmperiyasının məhz bu azadlıq duyğularını boğmaq üçün 20 Yanvar qırğınını törətdiyini, lakin cəsur Azərbaycan xalqının 1991-ci ildə yenidən müstəqilliyinə qovuşduğunu diqqətə çatdırıb. O, Pakistanın Azərbaycanın müstəqilliyini tanıyan ilk ölkələrdən olduğunu, həmin tarixdən iki xalq və dövlət arasında qarşılıqlı dostluq və mehribanlığın bərqərar edildiyini vurğulayıb.

Seminarda Azərbaycanla və 20 Yanvar faciəsi ilə bağlı suallar cavablandırılıb, Qanlı Yanvar hadisələrinə dair sənədli film nümayiş etdirilib.

Tədbirin keçirildiyi salonun foyesində 20 Yanvar hadisələrinə dair fotostendlər quraşdırılıb, eləcə də Ermənistan-Azərbaycan, Dağlıq Qarabağ münaqişəsi, Azərbaycan həqiqətləri ilə bağlı müxtəlif məzmunlu kitablar, bukletlər və digər əyani materiallardan ibarət sərgi keçirilib, faciə ilə bağlı materiallar iştirakçılara paylanılıb.

Qulu Kəngərli

AZƏRTAC-ın xüsusi müxbiri

İslamabad