ELM VƏ TƏHSİL


“İsmayıllı rayonu meşə bitkilərinin çöl bələdçi kitabı”nın təqdimatı olub

Bakı, 14 fevral, P.İmanova, AZƏRTAC

Fevralın 14-də Azərbaycan Milli Elmlər Akademiyasının (AMEA) Botanika İnstitutunda bu elm müəssisəsinin əməkdaşı, biologiya üzrə fəlsəfə doktoru Eldar Şükürovun “İsmayıllı rayonu meşə bitkilərinin çöl bələdçi kitabı”nın təqdimatı olub.

AZƏRTAC xəbər verir ki, tədbirdə institutun direktoru, AMEA-nın müxbir üzvü Validə Əlizadə kitabın məziyyətlərindən danışıb. Bildirilib ki, bu kitab Avropa İttifaqının ENPI FLEG II (Avropa Qonşuluq və Əməkdaşlıq Aləti Meşə Qanunvericiliyinin Gücləndirilməsi və İdarəedilməsi) Proqramı çərçivəsində nəşr edilib. Kitab İsmayıllı rayonunun meşələrində yayılmış qatırquyruğukimilər, qıjıkimilər, çılpaqtoxumlular və örtülütoxumlular şöbəsinə daxil olan ağac, kol, lian və ot bitkilərinin təbiətdə olarkən tez və səmərəli təyin edilməsi üçün nəzərdə tutulmuş bir vəsaitdir. Nəşrin məqsədi hər hansı bir formal botaniki təlim keçmədən təbiətsevər insanlara meşələrdə rast gəlinən ali bitki növlərini təyin etməkdə kömək göstərməkdir. Kitabda verilmiş sadə və məntiqli istifadə qaydalarının tələblərini yerinə yetirməklə hər bir kəs İsmayıllı rayonunun meşə bitkiçiliyində rast gəlinən 255 ali bitki növünü asanlıqla təyin edəcək.

V.Əlizadə bu cür kitablara ehtiyac duyulduğunu, nəşrin yerli əhaliyə və ölkəmizə gələn turistlərə kömək edə biləcəyini söyləyib.

Ümumdünya Təbiəti Mühafizə Fondunun (WWF) Azərbaycan nümayəndəliyinin direktoru Elşad Əsgərov fondun fəaliyyət istiqamətlərindən və həyata keçirdiyi layihələrdən söz açıb. Bildirilib ki, WWF tərəfindən hazırlanan kitabın nəşr etdirilməsinin məqsədi təbiətimizin zənginliyini bir daha diqqətə çatdırmaq və onun mühafizəsinə nail olmaqdır.

FLEG II proqramının milli əlaqələndiricisi Könül Əhmədova bu proqram barədə məlumat verib. Bildirilib ki, kitab Avropa Birliyinin ENPPI FLEG layihəsi çərçivəsində nəşr edilib. Kitab İsmayıllı rayonunun ərazisində və respublikanın digər oxşar botaniki-coğrafi rayonlarında rast gəlinən eyni meşə bitkilərini asanlıqla təyin etməkdə və onların qısa morfologiyası, Azərbaycanda yayılması, yaşayış mühiti, təsərrüfat əhəmiyyəti haqqında vacib məlumatların əldə edilməsində kömək göstərəcək.

Kitabın müəllifi E.Şükürov nəşrin hazırlanması prosesindən danışıb, kitabdan istifadə qaydaları barədə məlumat verib. Qeyd olunub ki, bu bələdçi kitabın məqsədi təbiətsevər insanlara meşələrimizdə rast gəlinən ali bitki növlərini müəyyənləşdirməkdə kömək etməkdir.

Digər çıxış edənlər İsmayıllı rayonunun meşə bitkilərinin öyrənilməsində və təyin edilməsində kitabın əhəmiyyətini diqqətə çatdırıblar.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.