REGİONLAR
İsmayıllı rayonunun yaradılmasının 83-cü ildönümü qeyd olunub
İsmayıllı, 26 noyabr, Adil Ağayev, AZƏRTAC
Səksən üç il bundan əvvəl Azərbaycanda yeni bir ərazi vahidi –İsmayıllı rayonu yaradılıb. Ayrı-ayrı vaxtlarda müxtəlif inkişaf dövrü yaşayan, sosial-iqtisadi, infrastruktur, sənaye və kənd təsərrüfatı baxımından inkişaf edən rayon bu gün 1 şəhər, 2 qəsəbə və 105 kəndi əhatə edir. Hazırda rayon əhalisinin sayı 83 min nəfərdən çoxdur. Onlardan 33 faizi şəhərdə, 67 faizi isə kəndlərdə yaşayır.
Bu gün rayonda kənd təsərrüfatı, sənaye, turizm, elm və təhsilin inkişafına xüsusi diqqət yetirilir, rayon mərkəzi, qəsəbə və kəndlər sürətli inkişaf dövrünü yaşayır, insanların sosial həyatında, məişətində yeniləşmə özünü göstərir. İsmayıllılar daha xoşbəxt və firavan həyata qovuşurlar.
AZƏRTAC xəbər verir ki, bu məlumatlar rayonun yaradılmasının 83-cü ildönümünə həsr olunmuş toplantıda sadalanıb.
Toplantının iştirakçıları əvvəlcə ümummilli lider Heydər Əliyevin şəhərin mərkəzində ucaldılmış abidəsi önünə gül-çiçək düzərək xatirəsini ehtiramla yad ediblər.
İsmayıllı şəhərindəki Heydər Əliyev Mərkəzində keçirilən tədbirdə çıxış edənlər rayonun inkişaf tarixi barədə ətraflı danışaraq ulu öndər Heydər Əliyevin, onun layiqli siyasi varisi Prezident İlham Əliyevin Azərbaycanın digər bölgələri kimi İsmayıllıya da göstərdikləri diqqət və qayğıdan bəhs ediblər. Natiqlər dövlətimizin başçısının İsmayıllıya son səfərlərini xatırladaraq, müdrik rəhbərimizin rayonun sosial-iqtisadi inkişafı ilə əlaqədar verdiyi konkret tapşırıqlardan danışıblar.
Şəhərin 1 və 4 nömrəli məktəblərinin müəllimləri Mirvari Musayeva, Rəna Mirzəliyeva, Dövlət İdarələri və İctimai Xidmət İşçiləri Həmkarlar İttifaqı rayon komitəsinin sədri Zahid Əkbərov, “Heydər Əliyev idarəetmə məktəbi”nin icraçı direktoru Fərman Bəşirov, rayon veteranlar şurasının sədri Abduləli Əliyev İsmayıllının inkişaf mərhələləri ilə bağlı xatirələrini bölüşüblər.
Rayon icra hakimiyyətinin başçısı Mirdaməd Sadıqov toplantıda çıxış edərək, Prezident İlham Əliyevin İsmayıllıya diqqət və qayğısından söhbət açıb, rayonun inkişafı üçün bundan sonra da lazımi tədbirlərin görüləcəyini, turizm, kənd təsərrüfatı, sənayenin potensialından maksimum səmərəli istifadə olunacağını vurğulayıb.
Yığıncaqda bir qrup veterana mükafatlar verilib.
Tədbir konsert proqramı ilə davam etdirilib.