REGİONLAR
İsmayıllıda “Yeni dünya nizamı və milli ideya” kitabının təqdimatı olub
İsmayıllı, 20 fevral, AZƏRTAC
İsmayıllıda Prezident Administrasiyasının rəhbəri, akademik Ramiz Mehdiyevin “Yeni dünya nizamı və milli ideya” kitabının təqdimatı keçirilib.
AZƏRTAC xəbər verir ki, rayon icra hakimiyyətinin ictimai-siyasi və humanitar məsələlər şöbəsinin, rayon təhsil şöbəsinin və rayon mərkəzi kitabxanasının birgə təşkilatçılığı ilə reallaşan tədbiri təhsil veteranı Valeh Salehov açıb, akademik Ramiz Mehdiyevin “Yeni dünya nizamı və milli ideya” kitabının zamanla sınanmış fəlsəfi baxışlar, fikir və mülahizələrlə zəngin olduğunu bildirib. Qeyd edib ki, nəşrdə, həmçinin Heydər Əliyev şəxsiyyəti üçün xarakterik olan liderlik, müdriklik, uzaqgörənlik və digər nadir keyfiyyətlərə, Ulu Öndərin xilaskarlıq missiyasına, milli ideyanın və məfkurənin formalaşdırılması, dövlət quruculuğu sahəsindəki roluna və misilsiz xidmətlərinə də toxunulur.
Rayon icra hakimiyyəti başçısının müavini, ictimai-siyasi və humanitar məsələlər şöbəsinin müdiri Sevil Əhmədova “Yeni dünya nizamı və milli ideya” kitabı barədə məruzə edib. Bildirib ki, yeni nəşrdə Azərbaycanda müxtəlif dövrlərdə yürüdülən siyasətdən, onun nəticələrindən, bu siyasət kontekstində Heydər Əliyev fenomenindən, cəmiyyət və dövlət həyatının fəlsəfəsindən, tarixdə şəxsiyyətin rolundan ətraflı bəhs edilir. Ötən əsrin 70-ci illərindən başlayaraq müasir zamanadək Azərbaycanda, onun ətrafında cərəyan edən ictimai-siyasi proseslər dərin düşüncə süzgəcindən keçirilir, milli ideyanın necə yarandığı və formalaşdığı, həyata necə vəsiqə aldığı barədə suallara cavab verilir.
Kitabda milli ideologiya, müstəqil Azərbaycanın siyasi və iqtisadi strategiyası qloballaşma dövrünə uyğun nəzərdən keçirilir, bununla bağlı fəlsəfi fikirlərə geniş yer ayrılır.
Akademik Ramiz Mehdiyev Prezident İlham Əliyevi yeni dövrün lider siyasətçisi kimi səciyyələndirir, oxucuya onun dövlətin inkişafına dair baxışlarının həyata keçməsi sayəsində əldə olunan yüksək nəticələri təqdim edir.
Kitabın iki dildə - Azərbaycan və rus dillərində nəşr olunması oxucu auditoriyasını daha da genişləndirir.
Təqdimatda İsmayıllı şəhər 3 saylı tam orta məktəb-liseyin tarix müəllimi Vasif Cabbarov, İvanovka kənd tam orta məktəbinin müəllimi Polina Radayeva, rayon təhsil şöbəsinin böyük məsləhətçisi, Əməkdar müəllim Ramiz Baloğlanov, ehtiyatda olan polkovnik, rayon veteranlar şurasının sədri Əlaləm Babayev çıxış edərək “Yeni dünya nizamı və milli ideya” kitabının müasir dünyamızda milli ideologiyanın formalaşdırılması baxımından əhəmiyyətindən danışıblar.