REGİONLAR
İsmayıllıda qışa hazırlıq məsələləri müzakirə olunub
İsmayıllı, 26 oktyabr, AZƏRTAC
İsmayıllıda qış mövsümünə hazırlıq üzrə rayon qərargahı və fövqəladə hallar komissiyasının birgə yığıncağı keçirilib, aramsız yağan yağışların törətdiyi fəsadlar, qarşıda duran təxirə salınmaz vəzifələr müzakirə olunub.
AZƏRTAC xəbər verir ki, Heydər Əliyev Mərkəzinin konfrans zalında keçirilən tədbirdə əlaqədar qurumların, idarə, müəssisə və təşkilatların rəhbərləri, ağsaqqallar, rayon ictimaiyyətinin nümayəndələri iştirak ediblər.
Yığıncağı açan rayon icra hakimiyyətinin başçısı Mirdaməd Sadıqov qeyd edib ki, aramsız yağan yağışlar İsmayıllıda bir sıra fəsadlar törədib. Belə ki, İstisu, Sədiyan və Sərsurə kəndlərində torpaq sürüşməsi baş verib. Sərsurədə 8 evin köçürülməsi qərara alınıb. İstisuda sürüşmə davam edərsə, 10 ev üçün təhlükə yarana bilər. Bunun üçün də müvafiq tədbirlər müəyyənləşdirilib.
Əhən kəndi ətrafından keçən Cəfələ çayına gələn sel elektrik dirəklərini aparıb. Bir müddət bir neçə dağ kəndi işıqsız qalıb. Basqal-Sulut yolunun bir hissəsi sel nəticəsində dağılıb.
İcra hakimiyyətinin başçısı mövcud vəziyyətin ciddi nəzarətdə saxlanıldığını bildirərək, fövqəladə hallar komissiyasının hər bir hadisə ilə əlaqədar yerlərdə olduğunu, Ekologiya və Təbii Sərvətlər Nazirliyinin komissiyası ilə birgə tədbirlər müəyyənləşdirildiyini, lazımi köməklik göstərildiyini vurğulayıb.
Qeyd olunub ki, hər bir sakin, hər bir idarə, müəssisə və təşkilat rəhbəri, məktəb direktoru baş verə biləcək fəsadlara qarşı hazır olmalı, vətəndaşların evlərinin tam sığortalanması həyata keçirilməlidir.
Tədbirdə rayon icra hakimiyyəti başçısının müavini Mahmud Süleymanovun, şəhər inzibati ərazi dairəsi üzrə icra nümayəndəsi Məhərrəm Əhmədovun, rayon təhsil şöbəsinin müdiri Rasim Orucovun hesabatları dinlənilib, müzakirələr aparılıb.
Qış mövsümünə hazırlıqla əlaqədar rayon elektrik şəbəkəsi, qaz istismarı sahəsi, kommunal müəssisələr kombinatı, “9 saylı yol istismarı” MMC tərəfindən bir sıra tədbirlərin görüldüyü qeyd olunub.
Yığıncaqda mövcud vəziyyətin bir daha nəzərdən keçirilməsi, nəticələrin təhlil olunması və çox qısa müddətdə lazımi tədbirlərin görülməsi ilə əlaqədar konkret təkliflər söylənilib.
Su-kanal və suvarma sistemləri idarələrinin, rayon təhsil şöbəsinin, Təhsil Nazirliyinin 3 saylı regional maliyyə və hesablaşma mərkəzinin, şəhər inzibati ərazi dairəsi üzrə icra nümayəndəliyinin rəhbərlərinə qışa hazırlıqla bağlı işlərində dönüş yaratmaq barədə ciddi tapşırıqlar verilib.
Tədbirdə ağsaqqalların və ictimaiyyət nümayəndələrinin təklifləri dinlənilib, ətraflı müzakirələr aparılıb.