DÜNYA
İspaniyada diqqət payızda keçiriləcək parlament seçkilərinə yönəlib
Madrid, 27 may AZƏRTAC
Ötən bazar günü İspaniyada yerli özünüidarə orqanlarına seçkilər keçirildi. Seçkilərin nəticələrini qiymətləndirən ekspertlər artıq İspaniyanın siyasi səhnəsində ciddi dəyişikliklərin baş verməsini qeyd edirlər.
Uzun illərdir ki, İspaniyanın bütün əsas idarəetmə orqanlarında Xalq Partiyasının nümayəndələri təmsil olunur. Paytaxt Madriddə son 25 ildə şəhər meri vəzifəsinə məhz bu partiyanın nümayəndələri seçilirlər. Xalq Partiyasının əzəli rəqibi isə ölkənin ikinci böyük partiyası olan İspaniya Sosialist İşçi Partiyasıdır.
Qeyd edək ki, 24 may seçkiləri son bir neçə ildə ölkədə və ümumiyyətlə bütün Avropada müşahidə olunan sosial-iqtisadi böhran fonunda populyarlaşmış yeni siyasi qüvvələr üçün çox uğurlu oldu. Belə ki, İspaniyada həm yeni sağ-mərkəzçi qüvvə “Ciudadanos”, həm də küçə mitinqləri fonunda populyarlığını artırmış yeni sol partiya “Podemos” bu seçkilərdə böyük güclə iştirak etdilər. Paytaxt əhalisi “Podemos” partiyasının dəstəklədiyi “Ahora Madrid” hərəkatına daha çox etimad göstərdi. Hazırda paytaxt merinin məhz bu hərəkatın namizədi Manuela Karmena olacağı heç kimdə şübhə doğurmur. Barselonada da “Podemos”un dəstəklədiyi “Barcelona en Comu” hərəkatı səslərin çoxunu qazanıb. Onların Barselona meri vəzifəsinə namizədi xanım Ada Kolaudur.
“Podemos”un lideri Pablo İqlesia nəticələri şərh edərkən deyib: “Bizim iş prinsipimiz çox sadədir. Biz hamıya yardım əli uzatmağa hazırıq. Amma bizimlə işləmək istəyən hər kəs anlamalıdır ki, artıq başqa cür siyasət yürüdülməlidir”.
Beləliklə, İspaniya yeni siyasi eraya qədəm qoyur. İndi bütün diqqət noyabrda keçiriləcək parlament seçkilərinə yönəlib. Yerli özünüidarəetmə oqanlarına seçkilərdə İspaniyanın 13 regionundan altısında, o cümlədən Madrid və Barselonada məğlub olan baş nazir Mariano Raxoyun təmsil etdiyi Xalq Partiyası payızda əsas seçkilərdə uduza bilərmi? Artıq bu, real görünür. Bununla belə, 24 may seçkilərini şərh edən baş nazir nəticələrə baxmayaraq, payızda parlament seçkilərində partiyasının qalibiyyətinə əmindir. O deyib ki, seçicilər son nəticədə onun rəhbərlik etdiyi hökumətin böhran və işsizliklə mübarizəsini qiymətləndirəcəklər.
Aygün Əliyeva
AZƏRTAC-ın xüsusi müxbiri
Madrid, İspaniya