SİYASƏT
İspaniyanın EFE agentliyi Azərbaycanın xarici işlər nazirinin müsahibəsini yayıb
Bakı, 15 noyabr, AZƏRTAC
Azərbaycanın xarici işlər naziri Elmar Məmmədyarov İspaniyanın EFE agentliyinə müsahibə verib.
Xarici işlər naziri Elmar Məmmədyarov müsahibəsində Ermənistan qoşunlarının işğal olunmuş Azərbaycan ərazilərindən çıxarılmayınca münaqişənin sülh yolu ilə həllinin mümkün olmadığını bildirərək deyib: “Tezliklə Ermənistan bu reallığı dərk edərsə və öz qoşunlarını işğal olunmuş Azərbaycan ərazilərindən çıxararsa, münaqişə öz həllini tapar”.
Nazir bildirib ki, hazırda Ermənistan nəinki BMT Təhlükəsizlik Şurasının məlum qətnamələrinin tələblərini yerinə yetirir, əksinə münaqişənin mahiyyətindən yayınmaq üçün silahlı təxribatlara əl atır.
O qeyd edib ki, Ermənistan-Azərbaycan münaqişəsi nəticəsində Ermənistan Azərbaycan ərazilərinin 20 faizini işğal edib. Nəticədə Azərbaycan əhalisinin hər doqquz nəfərindən biri qaçqın və məcburi köçkün vəziyyətinə düşüb. “Ermənistan ölkəmizə qarşı müharibəyə başlamasına, Azərbaycana qarşı gücdən istifadəyə, onun ərazilərinin işğalına, zəbt olunmuş ərazilərdə etnik təmizləmə və digər ağır cinayətlərin törədilməsinə görə məsuliyyət daşıyır”, - deyə xarici siyasət idarəsinin rəhbəri vurğulayıb.
E.Məmmədyarov diqqətə çatdırıb ki, BMT Təhlükəsizlik Şurasının qətnamələrinə uyğun olaraq münaqişənin həlli Ermənistana və onun əhalisinə əməkdaşlıq perspektivlərindən və iqtisadi inkişafdan faydalanmağa imkan yaradacaq.
Azərbaycanın Şərqlə Qərbin qovuşuğunda yerləşdiyini deyən nazir ölkəmizin hər iki sivilizasiyanın dəyərlərini daşıdığını və onlar arasında yalnız coğrafi baxımdan deyil, həm də mədəni baxımdan körpü rolunu oynadığını diqqətə çatdıraraq deyib: “Azərbaycanın xarici siyasətinin prioritet istiqamətlərindən biri mədəniyyətlər və dinlərarası dialoqun təşviq edilməsidir”. Xarici siyasət idarəsinin rəhbəri Azərbaycanın bu ilin aprelində BMT-nin Sivilizasiyalar Alyansının 7-ci Qlobal Forumuna ev sahibliyi etdiyini və ölkəmizin BMT-nin Sivilizasiyalar Alyansı ilə yaxından əməkdaşlıq həyata keçirildiyini xatırladıb.
İspaniyanın Sivilizasiyalar Alyansına dəstəyini yüksək qiymətləndirən nazir E.Məmmədyarov son illər ərzində Bakı ilə Madrid arasında pozitiv dialoqun inkişaf etdiyini və əlaqələrin gücləndiyini bildirib. Onu da əlavə edib ki, bu, ikitərəfli əlaqələrin inkişaf etdirilməsi potensialının və imkanlarının son həddi deyil.
Azərbaycanın Avropa İttifaqı ilə əlaqələrinə toxunan Elmar Məmmədyarov 2016-cı ildə Aİ ilə münasibətlərdə iki mühüm ildönümünün qeyd olunduğunu vurğulayaraq deyib: Avropa İttifaqı ilə Tərəfdaşlıq və Əməkdaşlıq haqqında Sazişin 20 illiyi, həmçinin Aİ və Azərbaycan arasında enerji sahəsində strateji tərəfdaşlığa dair Anlaşma Memorandumunun 10 illiyi qeyd edilir. Son iki onillik ərzində Aİ ilə əlaqələr müxtəlif mərhələlərdən keçib və qarşılıqlı maraq doğuran sahələrdə daha yaxın və faydalı əməkdaşlığın inkişafı ilə nəticələnib”.
Azərbaycanın zəngin karbohidrogen resurslarına malik olduğunu bildirən xarici işlər naziri ölkəmizin əhəmiyyətli həcmdə xam neftin Avropa bazarlarına çıxarılmasını təmin etdiyini, Aİ-nin enerji təhlükəsizliyinə əsaslı töhfə verdiyini vurğulayıb.
Nazir Aİ ilə enerji sahəsində əməkdaşlıq çərçivəsində Azərbaycan qazının ixracını nəzərdə tutan “Cənub Qaz Dəhlizi” layihəsi üzərində işin aparıldığını diqqətə çatdırıb. Bu layihənin Avropanın enerji təhlükəsizliyinin təmin edilməsində və enerji təminatının diversifikasiya olunmasında mühüm amil olduğunu bildirib.
Azərbaycan-Rusiya əlaqələrindən danışan Elmar Məmmədyarov bu münasibətlərin strateji tərəfdaşlıq xarakteri daşıdığını və qarşılıqlı faydalı şəkildə inkişaf etdiyini söyləyərək deyib: “Azərbaycanda 500-dən artıq Rusiya şirkəti fəaliyyət göstərir, onların 200-ü sırf Rusiya kapitalı əsasında, 300-ü isə birgə müəssisə kimi çalışır”.
Nazir Azərbaycanın xarici siyasət prioritetləri sırasına Latın Amerikası ölkələri ilə əməkdaşlığın inkişaf etdirilməsinin də daxil olduğunu vurğulayaraq deyib: “Son illər ərzində Azərbaycan və Latın Amerikası ölkələri qarşılıqlı faydalı əməkdaşlığın inkişafı və dərinləşdirilməsi üçün əsaslı səylər göstərirlər”.
Aygün Əliyeva
AZƏRTAC-ın xüsusi müxbiri
Madrid