DÜNYA
İtaliyada qar uçqunu altında qalmış oteldən 8 nəfər xilas edilib
Bakı, 20 yanvar, AZƏRTAC
Mərkəzi İtaliyanın Abruzzo vilayəti rayonunda qar uçqunu altında qalmış oteldən sağ çıxarılan insanların sayı 8 nəfərə çatıb.
AZƏRTAC xəbər verir ki, Rainews24 telekanalının yaydığı məlumata görə, xilasedicilər otel binasında ilk sağ qalmış insanları cümə günü səhər aşkarlayıblar. Onların arasında iki qız uşağının da olduğu bildirilir. Sağ qalanlar binanın çardaq örtüyünün altında tapılıb.
Havanın yaxşılaşmağa başlaması xilasetmə əməliyyatları üçün nisbətən əlverişli şərait yaradıb. Telekanalın müxbirinin verdiyi məlumata görə, hadisə zonasında yağıntı dayanıb, havanın temperaturu mənfi 4 dərəcəyədək yüksəlib, qar örtüyü bir qədər əriməyə başlayıb.
Xatırladaq ki, çərşənbə günü gecə baş vermiş hadisə zamanı oteldə 30-dan çox insan olub. İndiyədək 4 nəfərin cəsədi aşkarlanıb. Zəlzələnin səbəb olduğu qar uçqunu nəticəsində dördulduzlu otel tamam dağılıb. Güclü qar səbəbindən xilasedicilər faciənin baş verdiyi yerə xizəklə gəlməli olublar.
Eyni zamanda, zəlzələ zonasındakı kiçik kəndlərdə yaşayan yüzlərlə sakin ətraf aləmdən tam təcrid olunub. Onların xilas olunmasına 7 min nəfərdən çox insan cəlb edilib.