MƏDƏNİYYƏT
İtaliyanın “Scambi Europei” portalı oxucuları Bakının turizm imkanları barədə məlumatlandırıb
Roma, 16 mart, AZƏRTAC
İtaliyanın “Scambi Europei” portalında “Azərbaycanın paytaxtı Bakıya xoş gəlmisiniz” sərlövhəli məqalə yerləşdirilib.
Məqalədə qeyd edilir ki, dünyanın ən gözəl şəhərlərindən biri olan Bakı Avropanın və Asiyanın kəsişdiyi nöqtədə, Xəzər dənizinin sahilində, neftlə zəngin bir ərazidə yerləşir. Azərbaycanın mədəni, sənaye və siyasi mərkəzi hesab olunan bu şəhərin adı “Badu-Kubə” – “küləklərin zərbəsi” və ya “Bad-Kiu” – “küləklər şəhəri” sözlərindən yaranıb.
Bakının tarixi haqqında məlumat verilən yazıda qeyd olunur ki, şəhərin əsas tarixi mərkəzi sayılan İçərişəhər 2000-ci ildə UNESCO-nun Dünya İrs Siyahısına daxil olunub. Burada yerləşən Qız qalası, Şirvanşahlar sarayı və digər tarixi abidələr Bakının qədim simasını özündə əks etdirir. Azərbaycan, həmçinin bütün müsəlman Şərqində dünyəvi və peşəkar teatr sənətinin təşəkkül tapdığı ilk ölkədir.
Məqalədə diqqətə çatdırılır ki, Azərbaycan mötəbər beynəlxalq tədbirlərə ev sahibliyi edir. Bu sırada 2016-cı ildə Bakıda AZƏRTAC-ın ev sahibliyi ilə keçiriləcək Dünya Xəbər Agentliklərinin V Konqresi böyük əhəmiyyət kəsb edir. Müəllif AZƏRTAC-ın baş direktoru Aslan Aslanovun AGİ agentliyinə müsahibəsinə istinadla yazır: “Sürətli inkişaf dövrünü yaşayan Azərbaycan tolerant mühitin hökm sürdüyü, dinin dövlətdən ayrı olduğu bir ölkədir. Azərbaycan, eyni zamanda, sülh və sabitlik baxımından da model ölkə olmağa can atır”.
Yazıda deyilir: “Əgər siz, qeyri-adi Bakının enerjisini, tarixini, həyəcanını hiss etmək istəyirsinizsə mütləq Azərbaycana səfər etməlisiniz. Bakının memarlıq üslubu olduqca cəlbedicidir. Burada qədimliklə müasirliyin unikal vəhdəti hər kəsi heyran edir. “Alov qüllələri” kompleksi, eyni zamanda, digər müasir tikililər çağdaş şəhərin görüntüsünü özündə əks etdirir”.
Heydər Əliyev Mərkəzi haqqında məlumat verilən məqalədə diqqətə çatdırılır ki, bina dünya şöhrətli memar Zaha Hadidin layihəsi əsasında tikilib. Özündə müasirliyi ehtiva edən bu nadir arxitektura nümunəsi dünya memarlığının şah əsərlərindən biri hesab olunur.
Maqsud Dadaşov
AZƏRTAC-ın xüsusi müxbiri
Roma