Riqa, 20 noyabr, Nigar Cəfərli, AZƏRTAC

Mən Azərbaycanın vurğunuyam və hədsiz qonaqpərvərliyinə, adamı heyran edən dağ mənzərələrinə, Azərbaycan mətbəxinin unudulmaz ləzzətinə, ənənələrinə görə hələ də bu ölkəni çox sevirəm. Bu sözləri Latviyanın “Spare” Turizm Agentliyinin təsisçisi İvonno Kezbere AZƏRTAC-ın müxbiri ilə söhbətində deyib.

İ.Kezbere ilk dəfə Bakıya 2004-cü ildə Latviya Prezidenti Vayra Vike-Freyberqanın Azərbaycana səfəri zamanı gəlib. O, nümayəndə heyətinə daxil idi və turizm sahəsini təmsil edirdi. İ.Kezbere təəssüratlarını bölüşərək deyir: “Azərbaycana ilk səfərim zamanı başa düşdüm ki, bu ölkə Latviya turistində mütləq maraq doğuracaq. Oktyabrda Latviya Prezidentinin səfəri çərçivəsində Bakıda keçirilmiş biznes forumunda turizm firmaları ilə tanış oldum. Yanvar ayında artıq mən Azərbaycana konkret məqsədlə - ölkənin regionlarını turist kimi gəzmək məqsədilə gəldim. Beləliklə, mən Şəkini, Lənkəranı, Qubanı gördüm”.

Turizm agentliyinin direktoru deyir ki, Latviyaya qayıtdıqdan sonra o, bu şərq ölkəsinə olan məhəbbətini bizneslə məşğul olan dostlarına və tanışlarına da aşıladı. Onlar “Spare” agentliyinin Azərbaycana göndərdiyi ilk turistlər oldular. İ.Kezberenin dostlarının ilk getdikləri rayon Şəki oldu. Oraya təqribən 6 saata gedib çıxdılar. Bu, 10 il əvvəl olub və o zaman ölkənin regionları belə abad deyildi, bugünkü kimi modernləşdirilməmişdi. Bununla belə ölkənin bu əsrarəngiz guşəsi, yaşıllığa bürünmüş dağlar və Azərbaycan memarlığının şedevrləri unudulmaz təəssürat bəxş etdi.

İvonno Kezbere deyir: “Agentliyimizin saytında biz Latviya turistlərini Şərq ilə Qərbin qovşağında, İpək yolunda yerləşən Azərbaycandan zövq almağa dəvət edirik. Biz Azərbaycanın Latviyadakı səfirliyi ilə sıx əməkdaşlıq edirik”. İ.Kezbere qeyd edir ki, şübhəsiz, Latviya ilə Azərbaycan arasında turist mübadiləsi artır. “Spare” Turizm Agentliyinin təsisçisi deyir: “Lakin Latviyaya, eləcə də Azərbaycana turist axını yolunda əsas əngəl daimi birbaşa aviareysin olmamasıdır”. O əmindir ki, turizm sahəsi mədəni potensialın qorunub saxlanmasına və inkişafına təsir göstərir, müxtəlif ölkələr və xalqlar arasında münasibətlərin harmoniyasına səbəb olur.

İ.Kezbere deyir: “Turizm agentliyimiz həm də idman turizmi ilə, tibbi turizmlə məşğul olur. Artıq beş ilə yaxındır ki, turizm firmamız AFFA ilə sıx əməkdaşlıq edir, Latviyada, həmçinin 15-dən artıq ölkədə Azərbaycan yığmaları üçün təlim-məşq toplantıları keçirir. Tibbi turizm sahəsində də təcrübəmiz var, biz azərbaycanlı müştərilərimizə tibb müəssisəsi və müalicə edən həkim seçməkdə kömək göstərmişik”.

Oktyabrın axırlarında “Spare” Turizm Agentliyi Azərbaycan rəssamı Məryəm Ələkbərlinin rəsm sərgisinin təşkilinə kömək göstərib. İ.Kezbere qeyd edir ki, bu sərgi agentliyin ən gözəl və maraqlı mədəni layihələrindən biri olub. O deyir: “Bu layihə hazırlanarkən biz bu Azərbaycan rəssamına və onun işlərinə vurulduq. Bizə indi də zəng edib onun rəsmlərini soruşurlar. Riqalılarda belə bir fakt maraq doğurub ki, Daun sindromu olan bu istedadlı qız valideynlərinin səyi və məhəbbəti sayəsində öz nadir qabiliyyətini təkmilləşdirib. Bu, latviyalı uşaqlar üçün də nümunə olub”.

İvonno Kezbere hesab edir ki, “Məryəm Ələkbərlinin rəsmlərindən ibarət sərgi, Azərbaycan incəsənətinə maraq bizi Azərbaycan Mədəniyyəti Günləri təşkil etməyə ruhlandırdı. Bizə Azərbaycan xalçalarının sərgisini keçirmək ideyası ilə müraciət edirlər. Azərbaycan mədəniyyəti, Şərq özü avropalılar üçün yeni, öyrənilməmiş dəyərlər, ənənələrdir”.

Azərbaycan paytaxtı haqqında təəssüratlarını bölüşən İ.Kezbere qeyd edir ki, 10 ildə Bakı çiçəklənən Avropa şəhərinə çevrilib. İvonno Kezbere deyir: “Yola düşməzdən əvvəl mütləq gəzib bazarlıq etdiyimiz Azərbaycan bazarlarının təkrarsız koloriti, həm milli mətbəx, həm məşhur ənənəvi Azərbaycan qonaqpərvərliyi və səmimiyyət turizmin inkişafı üçün, Latviya turistinin Azərbaycana cəlb edilməsi üçün əlverişli amillərdir”.

Nigar Cəfərli

AZƏRTAC-ın xüsusi müxbiri

Riqa