ELM VƏ TƏHSİL
Jurnalistika fakültələrinin magistr pilləsinə daxil olmaq istəyənlər qabiliyyət imtahanı verəcəklər
Bakı, 28 mart, AZƏRTAC
Azərbaycan Mətbuat Şurası (MŞ) yaxın günlərdə jurnalistika üzrə magistraturaya qəbul imtahanının qabiliyyət imtahanı mərhələsində qabiliyyət imtahanı komissiyasının üzvləri kimi iştirak etməsi nəzərdə tutulan ekspertlərin siyahısını və onlarla bağlı zəruri məlumatları Tələbə Qəbulu üzrə Dövlət Komissiyasına (TQDK) təqdim edəcək.
MŞ-dən AZƏRTAC-a bildirilib ki, ali məktəblərin jurnalistika fakültələrinin magistr pilləsində təhsil almaq istəyən və 2015/2016-cı tədris ili üçün ali təhsil müəssisələrinin magistratura səviyyəsinə qəbul imtahanının birinci mərhələsində 50 və daha çox bal toplayan bakalavrların qeydiyyatı martın 19-dan 29-dək aparılacaq. Bunun üçün onlar TQDK-nın internet saytında müvafiq səhifədə (http://eservices.tqdk.gov.az/erizemag/) jurnalistika üzrə ixtisaslaşmalara qəbul olunmaq istəyən bakalavrların qeydiyyatı üçün nəzərdə tutulmuş bölməyə daxil olaraq sorğu anketini doldurmalıdırlar. Məsələ ilə bağlı prosedur qaydalar və proqramlar TQDK-nın rəsmi orqanı olan “Magistr” jurnalının üçüncü nömrəsində dərc edilib.
Bildirilib ki, 2015/2016-cı tədris ili üçün ali təhsil müəssisələrinin magistratura səviyyəsinə qəbul imtahanının birinci mərhələsində 50 və daha çox bal toplayaraq müsabiqə şərtlərini ödəyən və imtahanın ikinci mərhələsinə buraxılan bütün bakalavrlar bitirdikləri bakalavr ixtisaslarından asılı olmayaraq magistr pilləsindəki təhsillərini jurnalistika ixtisası üzrə davam etdirə bilərlər.