MƏDƏNİYYƏT
Kaliforniyada Azərbaycan kulinariyası haqqında kitabın təqdimatı olub
Vaşinqton, 29 iyun, AZƏRTAC
Kaliforniya ştatının Vernon şəhərində həmvətənimiz Fəridə Buyuranın “Nar və zəfəran: Azərbaycana kulinariya səyahəti” kitabının təqdimatı və imza sessiyası keçirilib. ABŞ-da qida delikateslərinin ən böyük distribüteri “Melissa’s Produce”un eksperimental mətbəx laboratoriyasında keçirilən tədbirə 30-dək kulinariya icmalçısı, bloger və jurnalistlər dəvət edilib.
Qonaqlar “Melissa’s Produce” aşpazlarının “Nar və zəfəran: Azərbaycana kulinariya səyahəti” kitabındakı reseptlərdən istifadə etməklə hazırladıqları Azərbaycan milli yeməklərindən dadıblar. Tədbir çərçivəsində Fəridə Buyuran Azərbaycan mətbəxi haqqında məlumat verib.
“Nar və zəfəran: Azərbaycana kulinariya səyahəti” (Pomegranates and Saffron: A Culinary Journey to Azerbaijan) kitabı 2014 və 2015-ci illərdə nəşr edilib. Kitab Azərbaycan mətbəxi haqqında ingilis dilində ilk müfəssəl nəşrdir. 336 səhifədən ibarət kitabda oxuculara 200 adda qəlyanaltı və salat, şorbalar, xəmir xörəyi, ət, tərəvəz və yumurtadan istifadə edilməklə hazırlanan xörəklər, çörək növləri, plov, içki və çərəzlərin Qərb ölkələri şəraitində hazırlanması üçün uyğunlaşdırılmış reseptlər təklif olunur. Kitaba, həmçinin Fəridə Buyuranın populyar azcookbook.com bloqundan seçilmiş reseptlər daxildir. Bundan başqa, kitaba daxil edilmiş Azərbaycan mədəniyyəti haqqında hekayələr, ölkəmizin mətbəxi və qonaqlıq məclisləri ilə bağlı atalar sözləri bu nəşrə təkraredilməz kolorit verir.
(Fotoşəkilləri Kim Fam və Yakir Levi çəkib).
Yusif Babanlı
AZƏRTAC-ın xüsusi müxbiri
Vaşinqton