Vaşinqton, 13 oktyabr (AZƏRTAC). Azərbaycanın Los-Ancelesdəki baş konsulluğunun təşəbbüsü və təşkilatçılığı, Azərbaycanın Mədəniyyət və Turizm Nazirliyinin dəstəyi ABŞ-ın Kaliforniya ştatında səhnələşdirilən “Yeddi gözəl” baleti okeanın o tayında ilk dəfə nümayiş etdirilib.

Üç mindən çox amerikalının izlədiyi tamaşa Kaliforniyanın ikinci ən böyük şəhəri olan San-Dieqonun tanınmış Şəhər Teatrında (Civic Theater) göstərilib.

San-Dieqo Baletinin səhnəyə qoyduğu tamaşanın xoreoqrafı sözügedən baletin direktoru, yüksək mükafatlar laureatı Xavier Velaskodur. Baletin musiqisi San-Dieqo şəhərində fəaliyyət göstərən nüfuzlu Grossmont Simfonik Orkestrinin ifasında səsləndirilib, bütün rollar isə amerikalı balet ustaları tərəfindən ifa edilib.

Dahi Qara Qarayevin baleti amerikalı tamaşaçıların ayaqüstü və gurultulu alqışları ilə qarşılanıb.

Tamaşadan sonra Azərbaycanın Los-Ancelesdəki baş konsulluğu tərəfindən rəsmi ziyafət verilib. ABŞ federal və yerli seçkili orqanlarının rəsmiləri, San-Dieqo və digər müxtəlif şəhərlərin bələdiyyə şuralarının üzvləri, xarici diplomatlar, ictimai və mədəniyyət xadimləri, rejissor və bəstəkarlar, universitet professorları, KİV nümayəndələri və digər şəxslər ziyafətdə iştirak ediblər.

Mərasimdə çıxış edən Azərbaycanın Los-Ancelesdəki baş konsulu Nəsimi Ağayev “Yeddi gözəl” baletinin bu nümayişini Azərbaycan mədəniyyəti tarixində əlamətdar hadisə kimi dəyərləndirib. Baş konsul uğurla keçən tamaşanı Azərbaycan mədəniyyət diplomatiyasının zəfəri kimi qiymətləndirib.

Sonra mərasimdə ABŞ konqresmeni Syuzan Deyvis, Milli Məclisin beynəlxalq münasibətlər və parlamentlərarası əlaqələr komitəsinin sədri, Avropa Şurası Parlament Assambleyasındakı daimi nümayəndə heyətinin rəhbəri Səməd Seyidov, Azərbaycan Bəstəkarlar İttifaqının sədri, Xalq Artisti Firəngiz Əlizadə, Milli Məclisin deputatı Asim Mollazadə, Grossmont Kollecinin prezidenti Sindi Mayls, tamaşanın dirijoru R.Tvid və xoreoqrafı X.Velasko çıxış edərək tamaşanın mahiyyətindən, “Yeddi gözəl” baletinin tərənnüm etdiyi tolerantlıq, multikulturalizm kimi bəşəri dəyərlərdən bəhs edib və öz təəssüratlarını bölüşüblər.

San-Dieqo şəhərinin Beynəlxalq məsələlər bürosunun rəhbəri Bryus Abrams çıxış edərək, şəhər merinin imzaladığı bəyannaməni təqdim edib. Bəyannaməyə görə, 2014-cü ilin 11 oktyabr tarixi San-Dieqo şəhərində “Yeddi Gözəl Günü” elan edilib.

Qeyd edək ki, tamaşadan dərhal sonra amerikalı tamaşaçılar müxtəlif internet səhifələrində və sosial şəbəkələrdə baletdən yüksək zövq aldıqlarını, Azərbaycan musiqisindən riqqətə gəldiklərini bildiriblər.

Yusif Babanlı

AZƏRTAC-ın xüsusi müxbiri

Vaşinqton