İDMAN
Kamandan oxatma yarışlarında ilk qızıl medal İtaliyanın hesabına yazılıb [YENİLƏNİB] VİDEO
İtaliyanı təmsil edən Natalia Valeeva və Mauro Nespoli gürcüstanlı Xatuna Nərimanidze – Laşa Pxakadze cütlüyündən üstün olublar.
Beləliklə, “Bakı-2015”-in kamandan oxatma yarışlarında ilk qızıl medal İtaliyanın hesabına yazılıb.
Bürünc medal uğrunda mübarizədə isə Ukrayna və Sloveniya atletləri üz-üzə gəliblər. Bu mübarizədə Lidiya Sıçenikova və Georgi İvanitski (Ukrayna) sloveniyalı Ana Umer-Rok Bizjak cütlüyünə qalib gələrək bürünc medala sahib çıxıblar.
19:11
Qarışıq komanda yarışlarının yarımfinal mərhələsində İtaliya və Ukrayna, Gürcüstan isə Sloveniya ilə qarşılaşır.
Bu gün qarışıq komanda yarışlarının birincisi məlum olacaq.
14:12
“Bakı-2015”-də qarışıq komanda yarışlarına start verilib.
Bu yarışda Azərbaycan-İtaliya, Danimarka-Niderland, Rusiya-Polşa, Finlandiya-Ukrayna, Gürcüstan-Rumıniya, İspaniya-Fransa, Türkiyə-Belarus və Sloveniya-Almaniya qarşılaşmaları oynanılacaq.
12:48
Kişilər arasında oxatma üzrə komanda yarışının dörddəbir mərhələsində üz-üzə gələcək komandalar müəyyənləşib.
Səkkizdəbir mərhələsinin yekun nəticələrinə əsasən, iyunun 18-də İspaniya-Belarus, Fransa-Almaniya, Ukrayna-İtaliya, Hollandiya-Rusiya yığmaları qarşılaşacaq.
10:56
Qadınların komanda yarışlarının səkkizdəbir final mərhələsində Azərbaycan-Almaniya, Belarus-İspaniya, Gürcüstan—Böyük Britaniya, Hollandiya-Ukrayna, İtaliya-Yunanıstan, Polşa-Danimarka, Fransa-Türkiyə, İsveçrə-Rusiya görüşləri keçirilib. Sərrast atışlardan sonra dörddəbir final mərhələsində iştirak edəcək komandalar məlum olub. Belə ki, iyunun 18-də Almaniya millisi Belarus, Gürcüstan yığması Ukrayna, İtaliya komandası Danimarka, Fransa kollektivi isə Rusiya ilə üz-üzə gələcək.
Kişilər arasında səkkizdəbir final mərhələsində isə Hollandiya, Polşa, Rusiya, İtaliya, Azərbaycan, Slovakiya, Ukrayna, Fransa, Norveç və Almaniya komandaları mübarizə aparırlar. Yığmamız bu mərhələdə İtaliyanı sınağa çəkəcək.
09:50
Bakı, 17 iyun, C.Rüstəmov, S.İsgəndərova, AZƏRTAC
İyunun 17-də Tofiq Bəhramov adına Respublika Stadionunda “Bakı-2015” birinci Avropa Oyunlarının kamandan oxatma yarışlarının növbəti turuna start verilib. Mübarizəyə qadınlar arasında komanda oyunlarının səkkizdəbir mərhələsindən başlanılıb.
AZƏRTAC xəbər verir ki, Azərbaycanı bu mərhələdə təmsil edən Olqa Senyuk, Nurlana Vəliyeva, Yayla Ramazanova Almaniyadan olan Yelena Richter, Liza Unruh, Karina Vinterlə qarşılaşacaqlar.
Bu gün, eyni zamanda, kişilər arasında da komanda oyunlarının səkkizdəbir mərhələsi keçiriləcək. Bu yarışda ölkəmizi Aleksey Kopnin, Taras Senyuk, Roman Vengerov təmsil edəcək. Onlar italyan Mauro Nespoli, David Pasqualucci, Mikel Frangiliyə qarşı mübarizə aparacaqlar.
Xatırladaq ki, kamandan oxatma yarışlarında 39 ölkədən 64-ü qadın və 62-si kişi olmaqla, 126 idmançı iştirak edir.
Ötən gün kişilər arasında fərdi reytinq mərhələsində Mauro Nespoli (İtaliya) 683 xalla birinci olub.
Qadınların mübarizəsində isə Lisa Unruh (Almaniya) 662 xalla fərdi reytinq mərhələsinə başçılıq edib.