Gəncə, 30 noyabr, Sabir Əliyev, AZƏRTAC

Yerli təhsil idarəetmə orqanlarında və təhsil müəssisələrində kargüzarlıq işinin aparılması və vətəndaşların müraciətlərinə baxılması məsələləri Gəncədə keçirilən zona seminar-müşavirəsində ətraflı müzakirə edilib.

AZƏRTAC xəbər verir ki, Təhsil Nazirliyinin təşkilatçılığı ilə keçirilən seminar-müşavirədə Prezident Administrasiyasının və nazirliyin rəsmiləri, Gəncə, Mingəçevir və Naftalan şəhərləri, Qazax, Ağstafa, Tovuz, Gədəbəy, Şəmkir, Daşkəsən, Göygöl, Samux, Goranboy, Kəlbəcər və Xocalı rayonlarının təhsil müəssisələrinin, o cümlədən bölgədə fəaliyyət göstərən kolleclərin, peşə məktəblərinin, liseylərin rəhbərləri və kargüzarlıq sahəsində çalışan işçilər iştirak ediblər.

Gəncədəki Heydər Əliyev Mərkəzində keçirilən müşavirədən əvvəl iştirakçılar ulu öndər Heydər Əliyevin mərkəzin qarşısında ucaldılmış abidəsini ziyarət edib, önünə gül dəstələri qoyublar. Sonra mərkəzlə tanışlıq olub.

Seminar-müşavirəni Təhsil Nazirliyinin daxili nəzarət şöbəsinin müdiri Kənan Quliyev açaraq, kargüzarlıq işinin və vətəndaşların müraciətlərinə baxılması vəziyyətinin mövcud qanunvericiliyin tələblərinə uyğun təşkilinin əhəmiyyətindən danışıb. Təhsil Nazirliyində, eləcə də təhsil müəssisələrində vətəndaşların qəbulunun daha da təkmilləşdirilməsi, qəbula yazılma prosesinin avtomatlaşdırılması və nəticələrin müşahidə sisteminin yaradılması ilə bağlı görülən işlər barədə ətraflı məlumat verilib.

Gəncə Şəhər İcra Hakimiyyəti başçısının humanitar məsələlər üzrə müavini Sevda Qurbanəliyeva şəhərdə təhsilin inkişafı istiqamətində həyata keçirilən tədbirlərdən və bu sahədə qazanılan uğurlardan bəhs edib, müzakirə olunan mövzu ilə bağlı fikirlərini açıqlayıb.

Sonra Təhsil Nazirliyinin əməkdaşı Elmir Həsənov çıxış edərək kargüzarlıq sistemində sənədlərin hazırlanmasına və rəsmiləşdirilməsinə qoyulan tələblərdən, sənədlərə əlavələrin edilməsi, qərarların, sərəncamların, protokolların, əmrlərin hazırlanması və tərtib olunması qaydalarından, onların icrasına nəzarətin təşkili, işlənilmiş sənədlərin arxivdə saxlanılması prosesi ilə bağlı görülməli olan zəruri işlərdən, elektron sənədlərlə əlaqədar kargüzarlığın aparılması məsələlərindən danışıb.

Seminar-müşavirədə cari ildə nazirliyin “146 - Qaynar xətt” telefon məlumat mərkəzinə daxil olan zənglər və qəbul mərkəzində vətəndaşlara göstərilən xidmətlərlə bağlı statistika açıqlanıb.

Azərbaycan Respublikası Prezident Administrasiyasının sənədlərlə və vətəndaşların müraciətləri ilə iş şöbəsi müdirinin müavini Fikrət Əzizov çıxış edərək vətəndaşların müraciətləri ilə bağlı sənədlərlə işin düzgün qurulmasının vacibliyini, eləcə də bu sahədə müasir texnologiyalardan istifadənin aktual məsələ olduğunu diqqətə çatdırıb. Prezident Administrasiyasının rəsmisi “Vətəndaşların müraciətləri haqqında” 2015-ci il 30 sentyabr tarixli Qanunun önəmini vurğulayıb, həmin qanunun tətbiqi ilə əlaqədar noyabrın 12-də dövlətimizin başçısının imzaladığı Fərmanın normativ hüquqi bazanın daha da təkmilləşdirilməsinə və müasirləşdirilməsinə xidmət edəcəyini bildirib.

Diskussiya şəraitində keçən seminar-müşavirədə iştirakçıları maraqlandıran məsələlərə aydınlıq gətirilib.

Müşavirədən sonra Təhsil Nazirliyinin nümayəndələri Gəncədəki qaçqın şəhərciyində fəaliyyət göstərən Kəlbəcər tam orta məktəbinin kollektivi ilə görüşüblər. Məktəbə müxtəlif adda kitablar hədiyyə olunub.