SİYASƏT
Karlovı Varı yaxınlığında ümummilli lider Heydər Əliyevin anadan olmasının 91-ci ildönümünə həsr edilmiş qolf üzrə turnir və qəbul keçirilmişdir VİDEO
Karlovı Varı, 11 may (AZƏRTAC). Çexiyanın ən gözəl guşələrindən birində, dünya şöhrətli Karlovı Varı kurort şəhərciyinin yaxınlığında Azərbaycan xalqının ümummilli lideri Heydər Əliyevin anadan olmasının 91-ci ildönümünə həsr edilmiş tədbirlər keçirilmişdir.
Tədbirlər Heydər Əliyev Fondunun dəstəyi ilə Azərbaycanın Çexiyadakı səfirliyi və Karlovı Varıdakı fəxri konsulluğu tərəfindən təşkil olunmuşdur.
Qolf üzrə turnir Azərbaycanın Çexiyadakı səfiri T.Tağızadənin, fəxri konsul F.Mirzəyevin və Karlovı Varının keçmiş meri V.Qauptmanın iştirakı ilə açıq elan edilmişdir (http://azertag.com/ru/node/1226003).
Sigelnı klubunun qolf meydanında keçirilmiş turnirdə 40-dan çox oyunçu, o cümlədən Çexiyanın PGA reytinqli ilk onluğundan iki peşəkar idmançı, habelə görkəmli çex siyasətçiləri, o cümlədən ölkə parlamenti Senatının və Nümayəndələr Palatasının üzvləri iştirak etmişlər.
Turnirin yekunları üzrə qaliblərə Azərbaycanda hazırlanmış mükafatlar və qiymətli hədiyyələr təqdim edilmişdir.
Yarışlar başa çatdıqdan sonra səfirlik və fəxri konsulluq rəsmi qəbul keçirmişlər. Səfir Tahir Tağızadə qonaqları salamlayaraq Azərbaycan ilə Çexiya arasında dinamik inkişaf edən strateji müttəfiqlik münasibətlərinin yüksək səviyyədə olduğunu qeyd etmiş və əsası müstəqil Azərbaycan dövlətinin memarı və qurucusu, ümummilli lider Heydər Əliyev tərəfindən müəyyən edilmiş Azərbaycan xarici siyasətinin uğurla davam etdirildiyini bildirmişdir. Aprel ayında Azərbaycan Prezidenti İlham Əliyevin Praqaya səfəri zamanı iki ölkə arasında münasibətlərin yüksək səviyyədə olduğu bir daha öz təsdiqini tapmışdır.
T. Tağızadə demişdir: “Hər bir dövlətin, xüsusən imperiyaların dağılması nəticəsində yaranan dövlətlərin tarixində mütləq fövqəlmilli şəxsiyyət olur və o, xalqın öz müstəqilliyini qazanmasının əsas amillərindən birinə çevrilir. Çexiyada belə şəxsiyyət respublikanın ilk prezidenti Tomaş Masarik, Azərbaycanda isə Heydər Əliyev olmuşdur. Onların hər ikisi öz xalqlarının suverenliyini təmin etmək üçün istər şəxsiyyət səviyyəsində, istərsə də siyasi səviyyədə mümkün olan və olmayan işləri görmüşlər”.
Sonra çıxış edən Çexiya parlamentinin vitse-spikeri V.Filip istər dövlətlərarası, istərsə də insanlararası səviyyələrdə Çexiya-Azərbaycan münasibətlərindən çox razı qaldığını bildirmişdir. Onun fikrincə, Praqada Azərbaycan diplomatiyasının yeddi illik intensiv fəaliyyətindən sonra iki ölkə arasında münasibətlər dönməz xarakter almışdır.
Karlovı Varının meri Petr Kulqanek rəhbərlik etdiyi şəhərin Çexiya-Azərbaycan əlaqələrinin inkişafında xüsusi rol oynadığını qeyd etmişdir. Şəhərin rəhbəri hər il minlərlə Azərbaycan vətəndaşının Karlovı Varı regionuna gəldiyini qeyd edərək ümidvar olduğunu bildirmişdir ki, şəhərlə Azərbaycan paytaxtı arasında birbaşa təyyarə xətti açılacaqdır.
Qəbulda çıxış etmiş məşhur Karlovı Varı simfonik orkestri dünya musiqisi klassiklərinin əsərlərini ifa etmişdir.
Qeyd etmək lazımdır ki, Karlovı Varıda təşkil edilmiş tədbirlər Çexiya parlamentinin vitse-spikeri V.Filipin rəsmi himayəsi, ölkənin daxili işlər naziri M.Xovanetsin, xarici siyasət, müdafiə və təhlükəsizlik məsələləri üzrə senat komitəsinin sədri Y.Regetsin, Prezident Administrasiyasının xarici əlaqələr şöbəsinin rəhbəri Q.Kmoniçekin, Nümayəndələr Palatasının xarici əlaqələr komitəsi sədrinin müavini K.Koneçnanın, bir çox çex senatorlarının, habelə Çexiya və Slovakiya parlamentlərinin iyirmiyə yaxın deputatının iştirakı ilə yüksək siyasi səviyyədə keçmişdir. Qonaqlar arasında xarici ölkələrin Çexiya Respublikasında akkreditə olunmuş diplomatik missiyalarının rəhbərləri də olmuşlar.
Pərvanə Qarayeva
AZƏRTAC-ın xüsusi müxbiri
Karlovı Varı