REGİONLAR
Kənd təsərrüfatı rayonu olan Kürdəmirdə dinamik artım təmin edilib
Kürdəmir, 18 aprel, AZƏRTAC
Kürdəmirdə 2015-ci ilin birinci rübünün sosial-iqtisadi inkişafının yekunları və qarşıda duran vəzifələrə həsr edilən hesabat yığıncağı keçirilib.
AZƏRTAC xəbər verir ki, rayon icra hakimiyyətinin başçısı Ceyhun Cəfərovun hesabat məruzəsi dinlənilib, müzakirələr aparılıb.
Bildirilib ki, keçən ilin müvafiq dövrü ilə müqayisədə rayonda ümumi məhsul buraxılışı 8,9 faiz artaraq 77 milyon 583,4 min manata çatıb. Bu müddətdə 151 yeni iş yeri açılıb ki, bunun da 131-i daimidir.
Kənd təsərrüfatı rayonu olan Kürdəmirdə bu sahədə dinamik inkişafın təmin edilməsi, müasir texnologiyaların tətbiqi və digər məsələlər diqqət mərkəzində olub. Cari ilin məhsulu üçün ötən payızda əkilən 37773 hektar taxıl sahəsinə mütəxəssislərin nəzarəti ilə aqrotexniki qulluq göstərilib. Zərərvericilərə qarşı 11600 hektardan çox sahədə kimyəvi mübarizə tədbirləri həyata keçirilib, 31200 hektardan çox sahəyə üzvi və mineral gübrələr verilib. 6 hektarda yeni, müasir istixana qurulub, 7 hektar kiçik istixanalarda tərəvəz məhsulları yetişdirilib.
Kənd təsərrüfatının aparıcı sahələrindən olan heyvandarlıqda da uğurlu nəticələr qazanılıb. Ötən ilin müvafiq dövrü ilə müqayisədə ət, süd istehsalı 0,9 faiz, yumurta istehsalı 0,8 faiz çoxalıb. Mal-qaranın cins tərkibinin yaxşılaşdırılması istiqamətində lazımi tədbirlər görülüb. Birinci rübdə 255 başadək iribuynuzlu qaramal süni mayalandırılıb, 130 baş cins buzov alınıb. Rayondakı süd zavodunun və “Kürdəmir Broyler” ASC-nin fəaliyyəti genişləndirilib. Damazlıq ana quşların sayı 16 min başa çatdırılıb, quş əti istehsalı artıb, 300 min ədəd yumurta istehsal edilib. Süd zavodunda isə hər gün 25-30 ton süd emal olunmaqla, 9 çeşiddə məhsul istehsal edilir.
Məruzə və çıxışlarda tikinti-quruculuq və abadlıq işləri sahəsində, yol infrastrukturunun yaxşılaşdırılmasında görülən işlər də işlər diqqətə çatdırılıb. Qələbə parkında, tarix-diyarşünaslıq muzeyində, YAP rayon təşkilatının binasında, Bayraq meydanında, Heydər Əliyev parkında, uşaq bağçası-körpələr evində təmir-tikinti, yenidənqurma işləri aparılıb.
Təhsil, səhiyyə, mədəniyyət sahələrinin maddi-texniki bazasının yaxşılaşdırılması istiqamətlərində də lazımi tədbirlər görülüb. Prezident İlham Əliyevin tapşırığına əsasən əhalinin kütləvi tibbi müayinəsi ilə əlaqədar fevralın 2-dən başlayan kampaniya müvəffəqiyyətlə davam edir. İndiyədək 89583 nəfər müayinə olunub. Artıq 43 yaşayış məntəqəsində bu iş başa çatdırılıb.
Həmçinin, hesabat dövründə rayonda yararsız elektrik dirəkləri, köhnə transformatorlar dəyişdirilib. İlin birinci rübündə müxtəlif diametrli 30 metr boru əsaslı təmir edilib, 4 yerdə qaz tənzimləyicisi qoyulub, 190 abonentin olduğu Garıs-Əyribənd və 130 abonentin məskunlaşdığı Ərşəli kəndlərində qazlaşdırma işləri başa çatdırılıb. Yaxın vaxtlarda bu kəndlərə təbii qaz veriləcək.
Hesabat yığıncağında qarşıda duran vəzifələrdən də ətraflı danışılıb və əminliklə bildirilib ki, kürdəmirlilər regionların sosial-iqtisadi inkişafına dair 2014-2018-ci illəri əhatə edən Dövlət Proqramında rayon üçün nəzərdə tutulan vəzifələrin vaxtında və müvəffəqiyyətlə həyata keçirilməsində var qüvvələri ilə çalışacaq, ölkəmizin daha işıqlı gələcəyi üçün əllərindən gələni əsirgəməyəcəklər.