İDMAN
Kevin Maqnussen: Bakı trası Montsa və Monakonun hibrididir
Bakı, 19 iyun, AZƏRTAC
AZƏRTAC “F1News.ru” saytına istinadla xəbər verir ki, “Haas” yürüşçüsü Kevin Maqnussenin fikrincə, bir il əvvəl “Bakı Şəhər Halqası”nda debüt yürüşü gözəl keçib, bu mövsümdə isə Azərbaycan Qran-Prisinin daha maraqlı olacağı gözlənilir.
Sual: F1“Haas” komandasının tarixində ikinci mövsümdür və onun ilk üçdəbiri arxada qalıb. Bu inkişaf mərhələsində komandanın irəliləyişini necə qiymətləndirərdiniz?
Kevin Maqnussen: Düşünürəm, hər şey yaxşı gedir. Artıq birinci mövsüm gözəl olub və komanda o zaman yaxşı nəticələr qazanıb. İkinci mövsümdə əvvəlkindən yaxşı nəticə göstərmək həmişə daha çətin olur, lakin hesab edirəm ki, biz buna nail olacağıq. Biz keçən il bütün il ərzində keçirdiyimiz yürüşlər qədər xal toplamışıq. İrəliləyişdən danışırıqsa, onda işlər heç də pis getmir. Keçən illə müqayisədə daha da təkmilləşmək və bir addım irəli getmək məqsədimiz idi.
Sual: Kanada Qran-Prisində biz komandalar arasında fərqin saniyənin onda biri qədər olduğu pelotonun ortasında gərgin mübarizənin növbəti nümunəsini gördük. Hamı “Ferrari” və “Mercedes”in mübarizəsindən danışır. Bəs “Force India”, “Toro Rosso”, “Williams”, “Renault” və “Haas” arasındakı rəqabəti necə səciyyələndirərdiniz?
Kevin Maqnussen: Rəqabət, həqiqətən, çox ciddidir, cüzi səhv belə baha başa gələ bilər. Lakin yürüşlər elə bu cür də olmalıdır. Formula-1-dək çıxış etdiyim bütün kateqoriyalarda məhz belə olub. Yaxşı haldır ki, çempionatda yenidən əsl mübarizə gedir.
Sual: Keçən il Bakıda şəhər trasında ilk dəfə yürüş keçiriləndə ona yalnız simulyatorda hazırlaşmaq mümkün idi. Bu cür imkan olmadığı halda siz nabələd traslarda yürüşlərə necə hazırlaşırsınız?
Kevin Maqnussen: “Bakı Şəhər Halqası”nadək mən bu trası heç vaxt simulyatorda öyrənməmişəm. Boksdan yalnız təxmini təsəvvürün olduğu trasa çıxmaq maraqlı təcrübədir. Bütün döngələri sıfırdan öyrənmək lazım gəlir. Lakin tras əla idi və mən yenidən oraya qayıtmaq istəyirəm.
Sual: Yeni, daha enli və sürətli maşınlar özlərini bu trasda necə göstərər?
Kevin Maqnussen: Zənnimcə, maraqlı olacaq. Sıxma gücü artıb, buna görə də biz döngələri tez keçə bilərik. Lakin düz yerdə sürət bir qədər azalıb, buna görə də Bakı keçən il bizim daha cəld olduğumuz traslardan birinə çevrilə bilər. Həftəsonu maraqlı olacağını vəd edir...
Sual: Keçən il əldə etdiyiniz təcrübə indi bu və ya digər dərəcədə köməyinizə gələ bilərmi?
Kevin Maqnussen: İndi mən trası tanıyıram, onun bütün döngələrində konfiqurasiyanı öyrənmişəm, ona görə də bu dəfə uyğunlaşma asan olacaq. Onlardan bəzilərini, bəlkə 13-cü döngəni də tam sürətlə problemsiz keçmək mümkün olacaq. Odur ki, yürüş maraqlı olacaq.
Sual: Görünür ki, keçən il Bakıda debüt yürüş gözəl keçib. Bu barədə nə deyə bilərsiniz?
Kevin Maqnussen: Yürüş, həqiqətən, əla olub. Bakı trasında ötüb keçmək üçün yaxşı imkanlar var, trasda da həmişə gərgin mübarizə gedir. Bütün bunlar çox maraqlıdır!
Sual: “Bakı Şəhər Halqa”sının hansı məntəqəsini ən çətin hesab edirsiniz və nə üçün belə hesab edirsiniz?
Kevin Maqnussen: İkinci sektoru. Sürət orada yüksək deyil, lakin tras ensizdir və səhv etmək ehtimalı çoxdur.
Sual: Bəs hansı sektordan daha çox xoşunuz gəlir?
Kevin Maqnussen: Mən yenə də ikinci sektoru, bütün bu dar məntəqələri deyərdim. Orada dəqiq sürmək lazımdır və bu, maraqlıdır.
Sual: “Bakı Şəhər Halqa”sının dövrəsi haqqında nə deyərdiniz?
Kevin Maqnussen: Zənnimcə, bu, bir növ Montsa və Monakonun hibrididir, bu da özlüyündə qeyri-adidir. Odur ki, mən bu trasla yeni görüşü gözləyirəm.