Kiyev, 27 may, AZƏRTAC

Azərbaycanın Ukraynadakı səfirliyində “Ukrayna Azərbaycanlılarının Elmi Şurası” ictimai təşkilatının birinci konfransı keçirilib.

Tədbir diplomatik nümayəndəliyimiz tərəfindən “Ukrayna Azərbaycanlılarının Birləşmiş Diasporu” (UABD) Ümumukrayna İctimai Təşkilatı ilə birlikdə təşkil edilib. Qeyd edək ki, adı çəkilən şura UABD-nin nəzdində fəaliyyət göstərir.

Əvvəlcə forum iştirakçıları Heydər Əliyevin adını daşıyan parkda Ulu Öndərin abidəsi qarşısına çiçəklər düzüblər.

Azərbaycanın Ukraynadakı səfiri Eynulla Mədətli diplomatik nümayəndəliyimizin Heydər Əliyev salonunda konfransı açaraq, iştirakçılara səmərəli fəaliyyət arzulayıb, əmin olduğunu bildirib ki, Şuraya daxil olan elm nümayəndələri nəinki təbiət və humanitar elmlərin profil sahəsində, həm də xalqın daha sıx birləşməsində tərəqqiyə kömək edəcəklər. Səfir Azərbaycanda Prezident İlham Əliyevin uğurla həyata keçirdiyi dövlət siyasətində elmin rolu və əhəmiyyəti barədə azərbaycanlı alimlərə ətraflı məlumat verib.

Sonra “Ukrayna Azərbaycanlılarının Elmi Şurası”nın sədri, hüquq elmləri doktoru, Kiyev Milli Aviasiya Universitetinin (KMAU) professoru, Ukraynanın Əməkdar Təhsil İşçisi, Ukrayna Elmlər Akademiyasının akademiki Arif Quliyev bu ölkədə elm xadimlərimizi birləşdirən Şura barədə məlumat verib.

Konfransda iştirak etmək üçün Bakıdan gələn AMEA-nın Humanitar Elmlər Bölməsinin akademik-katibi, M. Füzuli adına Əlyazmalar İnstitutunun direktoru, filologiya elmləri doktoru, akademik Teymur Kərimli forumun təşkilatçılarına və iştirakçılarına AMEA-nın prezidenti, akademik Akif Əlizadənin təbrik məktubunu oxuyub. Sonra o, məruzəsində “Ukrayna Azərbaycanlılarının Elmi Şurası” ictimai təşkilatının inkişafı və Azərbaycandan olan həmkarları ilə elmi əlaqələrin qurulması məsələlərinə toxunub.

Akademik Zərifə Əliyeva adına Beynəlxalq Elmi-Tibbi Mərkəzin rəhbəri, tibb elmləri doktoru, professor Aydın Salmanov, Ukraynanın Çerniqov Vilayət Apelyasiya Məhkəməsinin sədri, hüquq elmləri namizədi Sadiq Tağıyev, UABD-nin başçısı, hüquq elmləri namizədi, V.M.Koretski adına Dövlət və Hüquq İnstitutunun kiçik elmi əməkdaşı Hikmət Cavadov, filologiya elmləri namizədi, T.Şevçenko adına Kiyev Milli Universitetinin Filologiya İnstitutunun dosenti Zəminə Əliyeva, tarix elmləri namizədi, “Kiyev-Mogilyov Akademiyası” Milli Universitetinin dosenti Fərhad Turanlı, hüquq elmləri namizədi, V.Getman adına Kiyev Milli İqtisad Universitetinin dosenti Sadiq Əsgərov Şuranın ümidverici perspektivləri və planları barədə fikirlərini bölüşüblər.

Kiyev Milli Aviasiya Universiteti direktorunun elmi iş üzrə müavini, siyasi elmlər namizədi, dosent Maksim Əliyev, elə həmin ali məktəbin professoru, fizika-riyaziyyat elmləri doktoru Firdovsi Şərifov, “Dostluq” Azərbaycan-Ukrayna Cəmiyyətinin rəhbəri, texniki elmlər doktoru, professor Murad Ömərov, siyasi elmlər namizədi Azad Ömərov, iqtisad elmləri namizədi Ədalət Əbiyev, biologiya elmləri doktoru, professor Camal Rəhmətov, Herson vilayətində diasporumuzun liderlərindən biri, kənd təsərrüfatı elmləri namizədi Əlimərdan Kərimov, onun həmkarı Əli Poluxov və başqaları da Şuranın fəaliyyətinin inkişafına dair plan və baxışlarını bölüşüblər.

Konfransda bu ilin sentyabrında Şuranın rəhbərliyini demokratik prinsiplər əsasında seçmək məqsədi ilə qurumun nizamnaməsinə dəyişiklik edilməsi üçün işçi qrupunun yaradılması barədə qərar qəbul edilib.

“Ukrayna Azərbaycanlılarının Elmi Şurası” ictimai təşkilatının birinci konfransının iştirakçıları Azərbaycan Respublikasının Prezidenti İlham Əliyevə müraciət qəbul ediblər.

X X X

AMEA-nın Humanitar Elmlər Bölməsinin akademik-katibi, M.Füzuli adına Əlyazmalar İnstitutunun direktoru, filologiya elmləri doktoru, akademik Teymur Kərimli və “Ukrayna Azərbaycanlılarının Elmi Şurası” ictimai təşkilatının sədri Arif Quliyev Ukrayna MEA-nın vitse-prezidenti, akademik Anton Naumovets, MEA-nın vitse-prezidenti, akademik Sergey Piroşkov və “Qızıl fortuna” Beynəlxalq Akademiyasının baş direktorluğunun sədri, sosiologiya elmləri doktoru, Ukrayna Əməkdar İncəsənət Xadimi Dmitri Akimovla görüşüblər.

Görüşdə qarşılıqlı faydalı ikitərəfli əməkdaşlıq məsələləri müzakirə edilib.

Zeynal Ağazadə

AZƏRTAC-ın xüsusi müxbiri

Kiyev