CƏMİYYƏT


Konfutsi İnstitutu Azərbaycan və Çin xalqları arasındakı münasibətlərin möhkəmlənməsinə töhfə verir

A+ A

Bakı, 15 noyabr, AZƏRTAC

Azərbaycan Dillər Universitetində (ADU) bu ali təhsil ocağının nəzdində fəaliyyət göstərən Konfutsi İnstitutunun təşkilatçılığı ilə Qafqaz və Xəzər regionu üzrə “Çin gəncləri” inzibati bölməsinin rəhbəri Yan Tsin ilə görüş keçirilib.

ADU-dan AZƏRTAC-a bildiriblər ki, görüşdə Konfutsi İnstitutunun Azərbaycan tərəfdən direktoru, professor Rafiq Abbasov rəhbərlik etdiyi qurumun ictimai fəaliyyəti, həmçinin tarixi İpək Yolunun tərəqqisi üzrə “Bir kəmər və bir yol” qlobal Çin layihəsinin həyata keçirilməsi zamanı aparılan araşdırmalar haqqında məlumat verib. O, qonağı Konfutsi İnstitutunda ümummilli lider Heydər Əliyev və onun siyasi xəttinin layiqli davamçısı Prezident İlham Əliyevin Azərbaycan ilə Çin arasındakı çoxşaxəli əməkdaşlıq və dostluq əlaqələrinin inkişafı istiqamətində fəaliyyəti üzrə informasiya bazası ilə tanış edib.

Konfutsi İnstitutunun Çin tərəfdən direktoru xanım Li Jinhua Çin dili kursu, mədəni tədbirlərin, elmi tələbə seminarlarının, həmçinin KİV sahəsində gənclər siyasətinə və Azərbaycan-Çin əməkdaşlığına həsr edilən toplantıların keçirilməsi barədə danışıb.

ADU ilə tanışlıqdan məmnunluğunu bildirən Yan Tsin Konfutsi İnstitutunun Azərbaycan cəmiyyətini Çinin tarixi, mədəniyyəti, müasir həyatı ilə məlumatlandırması baxımından fəaliyyətini yüksək dəyərləndirib. Vurğulanıb ki, institut Azərbaycan və Çin xalqları arasındakı ənənəvi dostluq münasibətlərinin möhkəmlənməsinə böyük töhfələr verir.

Görüşdə, həmçinin gənclər siyasəti sahəsində iki ölkə arasında informasiya əməkdaşlığı ilə bağlı fikir mübadiləsi aparılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.