CƏMİYYƏT
Körpə uşaqların beyin inkişafına xüsusi diqqət yetirmək lazımdır
Bakı, 1 iyun, AZƏRTAC
1 iyun – Uşaqların Beynəlxalq Müdafiəsi Günü münasibətilə Səhiyyə Nazirliyinin Uşaq Bərpa Müalicə Mərkəzində (UBMM) tədbir keçirilib.
AZƏRTAC xəbər verir ki, tədbirdə mərkəzin baş həkimi Cəmilə Talıbova çıxış edib.
C.Talıbova bildirib ki, burada il ərzində 18 yaşına qədər təxminən 2300-ə qədər uşağa zəruri tibbi xidmət göstərilir. Mərkəzə müraciət edən uşaqların hər biri üçün fərdi müalicə planı tərtib edilir, onlar il ərzində 3-5 dəfə müalicə-bərpa prosedurundan keçir. Tibb müəssisəsinə müraciət edən xəstələrin 40 faizdən çoxunu nevroloji problemləri olan uşaqlar təşkil edir. Bunlar əsasən uşaq serebral iflicli xəstələrdir. Bəzi xəstələrdə sinir sistemi patologiyaları ilə yanaşı, digər somatik xəstəliklər də müşahidə edilir.
Baş həkim qeyd edib ki, il ərzində mərkəzə gələn uşaqların 60 faizi sağlamlıq imkanları məhdud olan uşaqlardır. “Ümumiyyətlə, uşağın inkişafı üç yaşına kimi sürətlə gedir. Valideynlər uşaqların əsasən çəki və boyunun artmasına diqqət yetirir. Lakin üç yaşına kimi uşaqların beyin inkişafına xüsusi diqqət yetirmək lazımdır. Uşaq üç yaşına kimi danışmırsa, ünsiyyət qura bilmirsə, hərəki funksiyaları yoxdursa, bunlar ciddi siqnal deməkdir və mütləq həkimə müraciət etmək lazımdır. Uşaqlar vaxtında müalicə olunduqda problemlərin də tez zamanda qarşısını almaq mümkün olur”,- deyə baş həkim əlavə edib.
Baş həkim bildirib ki, səhiyyə ocağının tibbi personalının peşə səviyyəsini və ixtisas dərəcəsinin artırması daim diqqət mərkəzindədir. Bu məqsədlə bir sıra tədbirlər həyata keçirilir, mütəxəssislər mütəmadi olaraq konfranslarda və təlimlərdə iştirak edirlər. Son üç ildə Bakının poliklinika və xəstəxanalarında mərkəzin həkimləri üçün beş təlim təşkil olunub. Təlimlər Türkiyənin Ankara Universitetinin pediatriya fakültəsinin mütəxəssisləri və UBMM-in həkimləri tərəfindən aparılıb. Axırıncı təlim “Uşaqların inkişafının izlənməsi üzrə təlimat” cari ilin mart ayında keçirilib.
Qeyd olunub ki, Mərkəzdə sağlamlıq imkanları məhdud uşaqların fiziki reabilitasiya ilə yanaşı, onların dolğun həyat yaşamasına və sosial adaptasiyasına da çox önəm verilir. Belə ki, Mərkəzdə təşkil olunan art-terapiya kursu keçən xəstələr Azərbaycan Rəssamlıq Akademiyasının Muzey-sərgi kompleksində “Mənim rəngli dünyam” adlı sərgidə iştirak ediblər.