SİYASƏT


Kuala Lumpurda “Discover Azerbaijan” videoçarxının təqdimatı olub

A+ A

Kuala Lumpur, 26 yanvar, AZƏRTAC

Bakıda keçiriləcək IV İslam Həmrəyliyi Oyunlarının Malayziyada təbliği məqsədilə Sənaye, Mənəvi və Mədəni Tərəqqi naminə Beynəlxalq Təşkilatın (OISCA-International) Azərbaycan üzrə rəhbəri Elçin Nəsirlinin təşəbbüsü, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının, Gənclər və İdman Nazirliyinin dəstəyi və Malayziyadakı səfirliyimizin köməyi ilə Kuala Lumpurda, Xalqa Güvən Dövlət Agentliyinin (MARA) qərargahında “Discover Azerbaijan” videoçarxının təqdimat mərasimi keçirilib.

Təqdimat mərasimində Azərbaycanın Malayziyadakı səfirliyinin əməkdaşları, “OISCA-International” təşkilatının və onun Malayziya bürosunun, Gənclər və İdman Nazirliyinin, MARA-nın, həmçinin Malayziyanın Beynəlxalq Ticarət və Sənaye, Gənclər və İdman nazirliklərinin nümayəndələri, yerli kütləvi-informasiya vasitələrinin və turizm şirkətlərinin rəhbərləri, iş adamları iştirak ediblər.

Çıxış edən səfir Qaley Allahverdiyev tədbirin təşkilində göstərdikləri köməyə görə Azərbaycan və Malayziya hökumətlərinə təşəkkürünü bildirib. O, 26 illik müstəqillik dövründə Azərbaycanın siyasi, iqtisadi, ictimai, mədəni, elmi və digər sahələrdə inkişafı barədə məlumat verib. Azərbaycanın dünya dövlətləri arasında xüsusi çəkiyə malik olması və regionda lider ölkəyə çevrilməsində ümummilli lider Heydər Əliyevin əvəzsiz xidmətlərini qeyd edib. Prezident İlham Əliyevin fəaliyyəti barədə məlumat verən səfir, həmçinin Ermənistan-Azərbaycan, Dağlıq Qarabağ münaqişəsi və Azərbaycanın tarixi torpaqlarının Ermənistan tərəfindən işğal edilməsi barədə danışıb.

Ölkə rəhbərliyinin Azərbaycanda idmanın inkişafına göstərdiyi qayğı və diqqət sayəsində idmançılarımızın Olimpiya Oyunlarında qazandıqları uğurlardan, 2015-ci ildə Bakı şəhərində keçirilmiş birinci Avropa Oyunları və 2016-cı ildə keçirilmiş Formula-1 yarışları barədə danışıb. Q.Allahverdiyev Azərbaycanın 2017-ci ildə IV İslam Həmrəyliyi Oyunlarına ev sahibliyi edəcəyini deyərək, malayziyalıları Həmrəylik Oyunlarında yaxından iştirak etməyə dəvət edib. Prezident İlham Əliyevin Sərəncamı ilə 2017-ci ilin Azərbaycanda “İslam Həmrəyliyi İli” elan edildiyi xüsusi vurğulanıb.

“OISCA-International” təşkilatının Azərbaycan üzrə rəhbəri Elçin Nəsirli malay dilində “Azərbaycanı kəşf et” adlı videoçarxın ərsəyə gəlməsində və Malayziyada təqdimatının keçirilməsində köməyə görə Azərbaycan hökumətinə, Qeyri-Hökumət Təşkilatlarına Dövlət Dəstəyi Şurasına, Gənclər və İdman, Mədəniyyət və Turizm nazirliklərinə və Azərbaycanın Malayziyadakı səfirliyinə, eyni zamanda, MARA Agentliyinə və “OISCA-International”ın Malayziya bürosuna minnətdarlığını bildirib.

E.Nəsirli rəhbərlik etdiyi təşkilatın təşəbbüsü ilə IV İslam Həmrəyliyi Oyunları və Azərbaycanın milli adət-ənənələri, mədəniyyət və turizm potensialını özündə əks etdirən “Discover Azerbaijan” videoçarxının hazırlandığını qeyd edib. Həmin videoçarxın Malayziyanın Bakıdakı səfirliyinin köməyi ilə malay dilinə tərcümə edildiyini bildirib. O, həmçinin tədbirdə iştirak edən jurnalistlərin və iş adamlarının suallarını cavablandırıb, Azərbaycan ilə əməkdaşlığın inkişaf etdirilməsi və tanışlıq məqsədilə onları ölkəmizə dəvət edib.

Sonra “Discover Azerbaijan” videoçarxının təqdimatı keçirilib.

Tədbirin sonunda çıxış edən MARA-nın baş katibi Datuk İbrahim Azərbaycan haqqında çox eşitdiyini bildirərək, bugünkü tədbirin ölkəmizin zəngin tarixə və mədəniyyətə, həmçinin böyük potensiala malik olduğunu bir daha sübut etdiyini vurğulayıb. O, rəhbərlik etdiyi qurumun Azərbaycanla əməkdaşlıq etməkdə maraqlı olduğunu deyərək, ölkəmizə səfər etməyə, həmçinin IV İslam Həmrəyliyi Oyunlarına dəstək verməyə hazır olduğunu diqqətə çatdırıb.

Tədbir iştirakçılarına, həmçinin Azərbaycanın tarixi, mədəniyyəti, turizm imkanları, mətbəxi haqqında buklet və jurnallar, “Discover Azerbaijan” videoçarxının DVD diskləri hədiyyə olunub.

Tədbir yerli KİV-lərdə və MARA TV-də geniş işıqlandırılıb.

Vüqar Ağayev

AZƏRTAC-ın xüsusi müxbiri

Kuala Lumpur

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.