Bakı, 25 fevral, AZƏRTAC

Xocalı soyqırımının 25-ci ildönümü ilə əlaqədar Azərbaycan Respublikasının Küveyt Dövlətindəki səfirliyi tərəfindən bir sıra tədbirlər həyata keçirilib. Belə ki, səfirliyin təşəbbüsü və dəstəyi ilə ərəb dilində hazırlanmış “Xocalı soyqırımı” kitabı təkrar nəşr olunub. 1992-ci ildə Xocalıda törədilən soyqırımını əyani şəkildə özündə əks etdirən sənədli filmin ərəb dilində DVD variantının çoxaldılaraq Küveyt Xarici İşlər Nazirliyi ilə yanaşı, digər dövlət, hökumət qurumlarına, Millət Məclisinə (parlament), ölkədə fəaliyyət göstərən ictimai təşkilatlara və kütləvi informasiya vasitələrinə göndərilib. Bununla yanaşı, Küveyt mətbuatında yayılması məqsədilə səfir Elxan Qəhrəmanın Xocalı soyqırımına həsr edilmiş müsahibəsi bir sıra KİV-lərə göndərilib.

Səfirlikdən AZƏRTAC-a verilən məlumata görə, Xarici İşlər Nazirliyi tərəfindən nəşr edilən “Diplomatiya Aləmi” jurnalının Xocalı faciəsi və bu soyqırımını tanıyan ölkələrlə bağlı xüsusi buraxılışı PDF formatda, həmçinin “Xocalıya ədalət!” Beynəlxalq Kampaniyası İctimai Birliyi tərəfindən Xocalı soyqırımı haqqında məlumatlar, “İRS” jurnalından çıxarılmış məqalələr ölkədə akkreditə olunmuş bütün səfirliklərə, beynəlxalq təşkilatlara, dövlət və hökumət qurumlarına çatdırılıb.

Azərbaycan Respublikasının insan hüquqları üzrə müvəkkili (ombudsman) Elmira Süleymanovanın Xocalı soyqırımının 25-ci ildönümü ilə əlaqədar bəyanatı Küveytin parlamentinə, Xarici İşlər Nazirliyinə, həmçinin digər nazirliklərə, ölkədə akkreditə olunmuş səfirliklərə və beynəlxalq təşkilatlara göndərilib. Həmçinin soyqırımının 25-ci ildönümü ilə bağlı Qafqaz Müsəlmanları İdarəsinin sədri Allahşükür Paşazadə, Bakı və Azərbaycan Arxiyepiskopu Aleksandr, Azərbaycandakı Dağ yəhudiləri dini icmasının rəhbəri Milix Yevdayev və Azərbaycandakı Alban-Udi xristian icmasının sədri Robert Mobilinin dünya dini liderlərinə, parlamentlərə, beynəlxalq təşkilatlara və insan hüquqları üzrə Avropa Məhkəməsinə ünvanlanmış birgə müraciəti Küveytin Vəqflər və İslam Məsələləri Nazirliyinə və əlaqədar dini qurumlara çatdırılıb.

Fevralın 21-də Küveytdə Xocalı soyqırımının 25-ci ildönümü ilə əlaqədar anım mərasimi keçirilib.

Səfir Elxan Qəhrəman çıxış edərək son yüzilliklərdə, hətta sovet dönəmində belə dəfələrlə erməni millətçi-şovinistləri tərəfindən azərbaycanlılara qarşı etnik təmizləmə, soyqırımı siyasətinin həyata keçirildiyini bildirib. Bu mənfur siyasətin davamı olaraq, 1992-ci il fevralın 25-dən 26-na keçən gecə Ermənistan silahlı qüvvələrinin o zaman sovet ordusunun Xankəndi şəhərindəki 366-cı motoatıcı alayının şəxsi heyətinin iştirakı ilə Azərbaycanın Xocalı şəhərinə hücum edərək azərbaycanlılara qarşı törətdikləri qanlı soyqırımı aktı bütövlükdə insanlığa qarşı ən qatı cinayətlərdən biri kimi tarixə düşüb. Səfir Azərbaycana qarşı təcavüzünü davam etdirən Ermənistanın ölkəmizin ərazisinin 20 faizini işğal etdiyini, nəticədə 1 milyondan artıq azərbaycanlının doğma yurd-yuvalarından didərgin düşdüyünü qeyd edib. O, Xocalı soyqırımına ilk dəfə siyasi qiymət verilməsi yönündə işlərə Azərbaycan xalqının ümummilli lideri Heydər Əliyev tərəfindən başladıldığını vurğulayaraq, hələ 1994-cü ildə Ulu Öndərin təşəbbüsü ilə Milli Məclisin “Xocalı soyqırımı günü haqqında” qərar qəbul etdiyini bildirib və həmin vaxtdan etibarən fevralın 26-nın Xocalı Soyqırımı Günü kimi qəbul olunduğunu və bütün beynəlxalq təşkilatların bu barədə məlumatlandırıldığını diqqətə çatdırıb.

Xocalı soyqırımının beynəlxalq səviyyədə tanıdılmasının Azərbaycan Prezidenti İlham Əliyevin uğurlu xarici siyasət kursunda mühüm yer tutduğunu bildirən səfir dövlət başçısının bu istiqamətdə bir sıra təxirəsalınmaz tədbirlər həyata keçirdiyini qeyd edib. O, Xocalı soyqırımı barədə həqiqətlərin dünya ictimaiyyətinə çatdırılması, onun beynəlxalq səviyyədə tanıdılması məqsədilə Heydər Əliyev Fondu tərəfindən də olduqca fəal və məqsədyönlü işlərin aparıldığını vurğulayıb.

Türkiyənin Küveytdəki səfiri Murad Tamer Xocalıda erməni vandalları tərəfindən qətlə yetirilən vətəndaşlarımıza Allahdan rəhmət diləyib, bu qətliamın XX əsrin ən qanlı hadisələrindən biri olduğunu vurğulayıb. O, Türkiyənin və Azərbaycanın daim bir-birinin yanında olduğunu qeyd edib. Səfir erməni cəlladlarının XIX əsrin sonlarından Azərbaycan və Türkiyə xalqlarına qarşı həyata keçirdikləri qanlı cinayətlərdən söz açıb. O, təcavüzkar Ermənistanın Azərbaycana və Türkiyəyə qarşı qaldırdığı iddiaların əsassız olduğunu bildirib.

Küveytdə yaşayan, işləyən, təhsil alan həmvətənlərimizi özündə birləşdirən Vətənsevər Dostluq Cəmiyyətinin sədri Könül Hacıyeva ölkəmizin taleyüklü problemi olan Dağlıq Qarabağ münaqişəsi, Azərbaycan ərazilərinin erməni vandalları tərəfindən işğalı zamanı törədilmiş vəhşiliklər, insan tələfatı barədə məlumatları tədbir iştirakçılarının nəzərinə çatdırıb.

Daha sonra “Xocalı” sənədli filmi göstərilib. Səfirliyin təşəbbüsü və yardımı ilə ərəb dilində hazırlanıb çoxaldılmış “Xocalı soyqırımı” kitabı tədbir iştirakçılarına təqdim olunub. Həmçinin iştirakçılar Xocalı soyqırımı və Ermənistan-Azərbaycan, Dağlıq Qarabağ münaqişəsini əks etdirən müxtəlif təbliğat materialları və fotostend ilə tanış olublar.