REGİONLAR


Laçın rayonu üzrə sosial-iqtisadi göstəricilər təhlil edilib

A+ A

Ağcabədi, 19 iyul, Tahir Ağaməmmədov, AZƏRTAC

Laçınlı məcburi köçkünlərin sosial vəziyyətinin yaxşılaşdırılması, problemlərin öyrənilməsi və vaxtında həll olunması daim diqqət mərkəzində saxlanılır. 2016-cı ilin birinci yarısında laçınlı məcburi köçkünlərin məskunlaşdıqları şəhər və rayonlarda 46 səyyar qəbul keçirilib. 3742 nəfərin iştirak etdiyi bu qəbullarda 360 nəfər, rayon icra hakimiyyəti başçısı aparatında isə 2019 nəfər rayon sakininin müraciəti dinlənilib.

AZƏRTAC xəbər verir ki barədə Ağcabədi rayonu ərazisindəki Taxtakörpü qəsəbəsində yerləşən Laçın Rayon İcra Hakimiyyətində 2016-cı ilin birinci yarımilinin sosial-iqtisadi inkişafının yekunlarına həsr olunan yığıncaqda məlumat verilib.

Yığıncaqda rayon icra hakimiyyətinin başçısı Aqil Nəzərlinin görülən işlər və qarşıda duran vəzifələr barədə məruzəsi dinlənilib, laçınlı məcburi köçkünlərin həyat şəraitinin yaxşılaşdırılması istiqamətində işlərin davam etdirildiyi diqqətə çatdırılıb. Bildirilib ki, cari ildə Taxtakörpü və Qayğı qəsəbələrində geniş abadlıq işləri aparılıb, 1000 ədəd müxtəlif növ həmişəyaşıl ağac, həmçinin qızılgül kolu və mövsümü çiçəklər əkilib. Məcburi köçkünlərin məskunlaşdığı 84 oba və 2 qəsəbədə əhalinin fasiləsiz elektrik enerjisi ilə təmin olunması üçün 10 və 04 kV-luq elektrik hava xətlərində yararsız hala düşmüş 11 min metr naqil yenisi ilə əvəzlənib, Şeylanlı-1 və Ağbulaq obalarına yeni 10 kV-luq elektrik verilişi xətti çəkilib. Vağazin, Şeylanlı, Mişni, Hacılar, Ağbulaq obalarında yeni transformatorlar quraşdırılıb, digər obalarda müxtəlif gücə malik 6 transformator əsaslı təmir edilib. Mişni, Alxaslı, Şeylanlı, Hacılar, Sadınlı obalarında, 552 və 21 ailəlik qəsəbələrdə olan içməli su şəbəkələrində yararsız hala düşmüş su xətlərinin 750 metr hissəsi yenisi ilə əvəz olunub. Qarıqışlaq kənd tam orta məktəbin həyətinə plastik boru ilə içməli su xətti çəkilib. Obalararası yollarda təmir işlər aparılıb.

Taxtakörpü qəsəbəsində qrunt sularının kənarlaşdırılması məqsədilə uzunluğu 400 metrdən çox olan kanal qazılıb. Azərbaycan Respublikası Məcburi Köçkünlərin Sosial İnkişaf Fondunun xətti ilə 552 ailəlik qəsəbədə qrunt sularının kənara axıdılması üçün drenaj şəbəkəsi tikilib.

Yığıncaqda diqqətə çatdırılıb ki, Laçın rayon əhalisi əsasən heyvandarlıq və bitkiçiliklə məşğul olur. Hesabat dövründə əhali və fermer təsərrüfatlarında 35 min 80 baş iribuynuzlu, 201 min 752 baş xırdabuynuzlu heyvan olub ki, bu da ötən illə müqayisədə çoxdur. Taxtakörpü ərazisində məskunlaşan məcburi köçkünlər taxıl biçinini başa çatdırıb, 4183 ton məhsul əldə ediblər.

Məruzə və çıxışlarda görülmüş işlərlə yanaşı, mövcud problem və çatışmazlıqlar da qeyd olunub, qarşıda duran vəzifələrdən danışılıb. Bildirilib ki, “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na əlavələrə əsasən qamış və daxal evlərdə məskunlaşmış ailələr üçün 1500 evin tikilməsi, Taxtakörpü qəsəbəsində həyətyanı sahələrə təsərrüfat suyunun verilməsi, Qayğı qəsəbəsində müvəqqəti məskunlaşmış məcburi köçkün ailələrin məişət qazı ilə təmin olunması, Ağbulaq, Vağazin, Ərdəşəvi, Alxaslı, Qarıqışlaq, Hacılar, Qoşasu və digər obalarda daxili avtomobil yollarının təmiri, Şeylanlı-1 və Vağazin-3 obasının içməli su ilə təmin edilməsi, 37 ailəlik qəsəbədə elektrik təchizatının yaxşılaşdırılması qarşıda duran vəzifələrdəndir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.