MƏDƏNİYYƏT
Laplandiyada qış nağılı – Santa Klausun vətənindən REPORTAJ
Bakı, 13 yanvar, Ay.Həsənova, E.Şahbalayev, AZƏRTAC
Finlandiyanın qışı çox gözəldir. İstər paytaxt Helsinkidə, istərsə də regionlarda qış vaxtlarında hər yer qara bürünür, amma eyni zamanda 10-15, bəzən isə 25-30 dərəcə şaxta olur. Buna baxmayaraq, ağ örtüyə bürünmüş evlər, küçələr, sakit-sakit yağan qar adamda xoş ovqat oyadır.
Finlandiya yeni il tətilini keçirmək üçün maraqlı ölkədir. Helsinkidə hər yeni il gecəsi əsas meydanda canlı konsert proqramı təşkil olunur, mənfi 10 dərəcəyədək şaxtanın olmasına baxmayaraq, minlərlə insan birlikdə yeni ili qarşılayır. Amma çoxları yeni ildə Finlandiyaya məhz Santa Klausun vətəni olan Laplandiyanı ziyarət etmək üçün gəlir.
Rovaniemi - Santa Klausun rəsmi şəhəri və kəndi
Ölkənin bu mədəni regionunda, Şimal qütb dairəsində Santa Klausun rəsmi şəhəri olan Rovaniemi yerləşir. Bu şəhərin 6000-ə yaxın əhalisi var. Laplandiyaya səyahətimiz də elə Rovaniemidən başladı.
Helsinkidən bura avtobusla 11 saatlıq yol qət etmək lazımdır. Şəhərə təyyarə və qatarla da gəlmək olar. Amma rahat avtobusla səyahət etmək daha məqsədəuyğundur, çünki təyyarə və qatardan xeyli ucuz başa gəlir. Şəhərdə münasib qiymətə otel də tapmaq mümkündür. Şimal qütbünə yaxın olduğu üçün burada səhər saat 11-də açılır, günorta saat 2-də isə hava qaralır. Bu kiçik şəhərdə 1 saat ərzində bütün görməli yerləri gəzmək olar.
Şəhərin mərkəzi küçəsi yeni il bayramında xüsusi bəzədilir. 2006-cı ildə Eurovizion yarışmasında qalib olan “Lordi” rok qrupunun üzvləri də bu şəhərdəndirlər. Onlar üçün bu küçədə abidə də ucaldılıb.
Qışda iqlimi sərt olduğu üçün Rovaniemiyə səyahət etsəniz, özünüzlə mütləq içi isti ayaqqabı, qalın üst geyimləri götürün. Quru şaxta olsa da isti paltarsız açıq havada 15 dəqiqədən çox qalmaq olmur. Xüsusilə də Azərbaycan kimi cənub ölkələrinin sakinləri soyuqdan diskomfort yaşamamaq üçün isti paltarları əksik etməməlidirlər.
Hər il minlərlə turist qış nağılını canlı-canlı yaşamaq üçün bu şəhərə, Santa Klausun evinə gəlir. Santa Klausun kəndi şəhərdən 8 kilometrlik məsafədə yerləşir. Statistikaya görə, bura dünyada ən çox ziyarət olunan turistik yerlərdən biridir.
Kəndin girişində ilk diqqəti cəlb edən yer Santa Klausun poçt xidmətidir. Yüzlərlə insan dostlarına və yaxınlarına məktublar və açıqcalar göndərmək üçün növbəyə dayanır. Dünyanın hər yerindən Santa Klausa gələn məktublar da burada toplanır.
Kənddə uşaqlar üçün suvenirlər, marallarla gəzinti və sairə maraqlı əyləncələr var. Ən əsas məqam isə Santa Klausun yanında olmaqdır. Onun evi kəndin düz mərkəzində yerləşir. Otağa keçmək üçün nağıl qəhrəmanlarının obrazları ilə bəzədilmiş dəhlizdən keçmək lazımdır. Biz də Santa Klausun qəbuluna düşə bildik, ona Azərbaycandan məktub, Bakının simvolu olan Qız Qalası suvenirini və şəkərbura hədiyyə etdik. Santa Klaus Bakıda olduğunu deyəndə biz çox təəccübləndik. Unutmuşduq ki, həqiqi Şaxta Babanın yanındayıq. Bizim təəccübümüzü görüb hazırcavab Santa Klaus Bakıda məhz yeni il gecəsi olduğunu deyəndə anladıq ki, özünün nağıl yox, real Şaxta baba kimi qəbul olunmasını istəyir. O, Azərbaycan uşaqlarına öz istəklərini bizim kamera vasitəsilə çatdıraraq onlara sülh arzuladı, yaxşı oxumağı, valideynlərin sözünə qulaq asmağı tövsiyə etdi.
Şaxta babanın evinə giriş pulsuzdur. Amma içəridə foto çəkməyə icazə verilmir. Yalnız Santa Klausun rəsmi fotoqrafı şəkil çəkir ki, onu da əldə etmək üçün 50 avro ödəmək lazımdır.
Santapark və Arktik Mərkəz
Ümumiyyətlə, Rovaniemi turizmin inkişafına böyük önəm verir. Bizimlə söhbətində şəhər meri Esko Lovonen qeyd etdi ki, ildən ilə bura gələn turistlərin sayı artır. Bu il isə Asiyadan, xüsusilə də Çindən olan ziyarətçilərin sayında çoxalma var. Mer həmçinin Santa Klaus kəndində yeni otelin inşa olunduğunu, xizəkçiliyin də inkişaf etdirildiyini söylədi. Turistlərin təhlükəsizliyi məsələlərinin də diqqətdə olduğunu, ümumən isə buranın sakit bir məkan olduğunu qeyd edən Esko Lovonen Rovaniemidə cənub ölkəsi olan Azərbaycan turistləri üçün maraqlı olacağını dedi. O burada yayın da ecazkar keçdiyini, günün işıqlı vaxtlarının 20 saat davam etdiyini söylədi. Mer Azərbaycanda da turizm sektorunun inkişaf etdirilməsindən xəbərdar olduğunu bildirdi.
Rovaniemidə digər maraqlı məkan isə Santaparkdır. Burada uşaqlar üçün canlı səhnəciklər, konsert proqramları təqdim olunur. İcraçı direktor İlkka Lankinen Santaparkın 1997-ci ildən fəaliyyət göstərdiyini, qış ayları ilə yanaşı, yayda da işini dayandırmadığını dedi. Buraya əsasən Rusiya, Çin, Avropa ölkələrindən turistlərin gəldiyini bildirən Lankinen Azərbaycandan da ziyarətçilərin olduğunu söylədi.
Rovanieminin görməli yerlərindən biri də Ounasyoki çayı sahilində qeyr-adi memarlıq üslubuna malik Arktik Mərkəzidir. Finlandiyanın Xarici İşlər Nazirliyinin Rovaniemidəki nümayəndəsi, bizi səfər boyu müşayiət edən Marti Ruokolaynenin sözlərinə görə, muzeydə arktik şimalın yerli sakinləri, Laplandiyanın tarixi, mədəniyyəti və təbiəti haqqında eksponatlar və məlumatlar əks olunub. O, Rovaniemi şəhərinin ikinci dünya müharibəsi zamanı almanlar tərəfindən dağıdıldığını və sonra yenidən bərpa olunduğunu söylədi, bütün bunlar və həmçinin yerli sakinlər olan saamların həyat tərzi haqqında maraqlı əşyaların muzeydə nümayiş olunduğunu qeyd etdi.
Laplandiya nağıllardan hər kəsin yaddaşında mifik bir məkan kimi qalsa da finlər bu nağılı reallığa çevirərək həm uşaqlara, həm də böyüklərə xoş günlər yaşatmağa nail olublar. Odur ki, qış nağılı üçün Laplandiyanı ziyarət etməyə dəyər.