SİYASƏT


Latviya Azərbaycan ilə bütün sahələrdə əlaqələri dərinləşdirməyə tərəfdardır

Riqa, 30 may, AZƏRTAC

Latviyada rəsmi səfərdə olan Azərbaycan Milli Məclisinin sədri Oqtay Əsədovun başçılıq etdiyi nümayəndə heyəti mayın 30-da bu ölkənin Baş naziri Maris Kuçinskis ilə görüşüb.

Baş nazir M.Kuçinskis Azərbaycan ilə açıq və konstruktiv siyasi dialoqu yüksək qiymətləndirərək qeyd edib ki, iki ölkənin iqtisadi sahədə əməkdaşlığı siyasi əlaqələr səviyyəsinə yüksəlib.

Milli Məclisin sədri Oqtay Əsədov deyib ki, ölkələrimiz arasında imzalanmış 34 sənəd əməkdaşlığın qurulması üçün möhkəm normativ-hüquqi bazadır. İki ölkənin ərazi bütövlüyü və dövlətlərin suverenliyi kimi beynəlxalq hüquq prinsiplərinin aliliyinə dair prinsipial mövqeyi dəyişməz qalır.

Görüşdə Azərbaycan ilə Latviyanın qarşılıqlı əlaqələri və əməkdaşlıq perspektivləri müzakirə olunub.

Elə həmin gün Latviya Prezidenti Raymonds Veyonis Milli Məclisin sədri Oqtay Əsədovun başçılıq etdiyi nümayəndə heyətini qəbul edib.

Latviya Prezidenti nümayəndə heyətini səmimi salamlayıb və Azərbaycanın milli bayramı – Respublika Günü münasibətilə təbriklərini çatdırıb.

Yüksək diqqətə və qonaqpərvərliyə görə Prezidentə təşəkkür edən O.Əsədov qeyd edib ki, bu, onun Latviyaya birinci səfəridir. Azərbaycan ilə Latviya dost və tərəfdaş ölkələrdir. Sevindirici haldır ki, hazırda siyasi münasibətlərin müsbət məcrada inkişafı müşahidə olunur. Ənənəyə çevrilən qarşılıqlı səfərlər və yüksək səviyyədə görüşlər ikitərəfli münasibətlərin daha da dərinləşməsinə töhfə verir.

Latviya Prezidenti vurğulayıb ki, ölkəsi ilə Azərbaycan arasında siyasi dialoqun intensivliyini belə bir fakt da sübut edir ki, hər iki ölkənin xarici işlər, iqtisadiyyat, nəqliyyat və müdafiə nazirləri daim əlaqə saxlayırlar. R.Veyonis məmnunluq hissi ilə qeyd edib ki, iki dövlət arasında körpü rolunu oynayan Azərbaycan icması Latviyanın ayrılmaz tərkib hissəsinə çevrilib.

R.Veyonis bildirib ki, hazırda Azərbaycan enerji və tranzit sektorlarında Avropa İttifaqının mühüm tərəfdaşıdır. Latviya bir sıra enerji layihələrində, o cümlədən TAP və TANAP kimi layihələrdə Azərbaycanın rolunu yüksək qiymətləndirir.

O.Əsədov vurğulayıb ki, Azərbaycan Milli Məclisi GUAM PA çərçivəsində Baltik Assambleyası ilə sıx əməkdaşlıq edir. Bu əməkdaşlıq Azərbaycan və Latviya parlamentləri arasında əlaqələrin möhkəmlənməsinə kömək edir.

İkitərəfli münasibətlərin dərinləşməsinin əhəmiyyətini vurğulayan tərəflər ümidvar olduqlarını bildiriblər ki, belə məxsusi maraq və diqqət Azərbaycan ilə Latviya arasında qarşılıqlı tarixi əlaqələrin genişlənməsinə və inkişafına bundan sonra da kömək edəcək.

Nigar Cəfərli

AZƏRTAC-ın xüsusi müxbiri

Riqa

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.