DÜNYA
Latviyada hökumət təsdiqlənib
Riqa, 12 fevral, AZƏRTAC
Latviya parlamenti Baş nazir Maris Kuçinskisin (“Yaşıllar” və Kəndlilər İttifaqı) hökumətinə əksər səs çoxluğu ilə etimad göstərib.
M.Kuçinskisin kabineti 60 səs lehinə, 32 səs əleyhinə olmaqla təsdiq edilib. Səsvermədən əvvəl keçirilən debatlarda yeni Baş nazir və onun komandasının ünvanına çoxlu tənqidi fikirlər səsləndirilib, eyni zamanda yeni kabinetə hökumət deklarasiyasında yer almamış sahələrə diqqət ayırmaqla konstruktiv və fəal işləmək arzu edilib.
Yeni hökumətin deklarasiyasının ən böyük bölməsi “Kənd təsərrüfatının möhkəmləndirilməsi”dir. Sənədin əsas maddələri investisiya mühitinin yaxşılaşdırılmasından, əlavə özünüidarə imkanları yaratmaqla sahibkarlığın stimullaşdırılmasından, yüksək əlavə dəyərə malik məhsulların ixracını genişləndirməkdən ibarətdir. Bölmədə “Rail Baltica” sürətli dəmiryolu magistralı layihəsini həyata keçirmək, İqtisadi Əməkdaşlıq və İnkişaf Təşkilatına daxil olmaq öhdəliyi ayrıca təsdiqlənir.
Yeni hökumətində Baş nazirin Yaşıllar” və Kəndlilər İttifaqının altı portfeli olacaq. Sabiq Baş nazir Laymdota Strauyumanın “Birlik” partiyası beş, Milli Birlik isə üç nazir kürsüsünə yiyələnib.
Maris Kuçinskisin seçiminə əsasən Rifah Nazirliyinə Yanis Reyrs (“Birlik”), Xarici İşlər Nazirliyinə Edqars Rinkeviçs (“Birlik”), Daxili İşlər Nazirliyinə Rixard Kozlovskis (“Birlik”), Təhsil Nazirliyinə Karlis Şadurskis (“Birlik”) rəhbərlik edəcək. Maliyyə naziri Dana Reyznietse-Ozola (“Yaşıllar” və Kəndlilər İttifaqı), ədliyyə naziri Dzintars Rasnaçs (Milli Birlik) öz vəzifəsində qalır. Nəqliyyat Nazirliyinə Uldis Auqulis (“Yaşıllar” və Kəndlilər İttifaqı), Səhiyyə Nazirliyinə Quntis Beleviç (“Yaşıllar” və Kəndlilər İttifaqı) rəhbərlik edəcək. Mədəniyyət naziri Datse Melbarde (Milli Birlik), müdafiə naziri Raymond Berqmanis (“Yaşıllar” və Kəndlilər İttifaqı), torpaq məsələləri naziri Yanis Duklavs (“Yaşıllar” və Kəndlilər İttifaqı) öz vəzifələrində qalacaq, iqtisadiyyat naziri vəzifəsini isə Arvil Aşeradens (“Birlikl) tutacaq. Ətraf mühitin mühafizəsi və regional inkişaf naziri Kaspar Herxards vəzifəsini davam etdirəcək.
Beləliklə, yeni hökumətdə səkkiz nazir əvvəlki vəzifəsində qalıb, üç nazir əvəz olunub.
Nigar Cəfərli
AZƏRTAC-ın xüsusi müxbir
Riqa