İQTİSADİYYAT
Ləğv prosesində olan banklar üzrə 747,7 milyon manatdan çox kompensasiya ödənilib
Bakı, 7 avqust, AZƏRTAC
Əmanətlərin Sığortalanması Fondu tərəfindən ləğv prosesində olan 11 bank üzrə 747 milyon 793 min manatdan çox kompensasiya ödənilib.
Fonddan AZƏRTAC-a bildiriblər ki, ləğv prosesində olan "Atrabank" ASC-də fiziki şəxslərin ümumi əmanətlərin məbləği 31 milyon 24 min manat olmaqla onlardan 26 milyon 995 min manatı qorunan əmanətlər, o cümlədən 14 milyon 614 min manatı kompensasiya olunan əmanətlərdir. Avqustun 4-nə Əmanətlərin Sığortalanması Fondu tərəfindən qorunan əmanətçilərə ümumilikdə 14 milyon 351 min manatdan çox kompensasiya ödənilib (ümumi kompensasiya öhdəliyinin 98,2 faizi) və 263 min 316 manat ödənilməmiş kompensasiya öhdəliyi qalıb.
"Qafqaz İnkişaf Bankı" ASC-də fiziki şəxslərin ümumi əmanətlərin məbləği 11 milyon 996 min manat olmaqla onlardan 6 milyon 617 min manatını qorunan əmanətlər, o cümlədən 2 milyon 90 min manatını kompensasiya olunan əmanətlər təşkil edir. Fond tərəfindən qorunan əmanətçilərə ümumilikdə 2 milyon 4 min manatdan çox kompensasiya ödənişi həyata keçirilib (ümumi kompensasiya öhdəliyinin 95,8 faizi), 86 min 452 manat ödənilməmiş kompensasiya öhdəliyidir.
"Bank Standard" Kommersiya Bankında fiziki şəxslərin ümumi əmanətlərin məbləği 596 milyon 499 min manat olmaqla onlardan 554 milyon 593 min manatı qorunan əmanətlər, o cümlədən 441 milyon 154 min manatı kompensasiya olunan əmanətlərdir. Qorunan əmanətçilərə ümumilikdə 437 milyon 609 min manatdan çox kompensasiya ödənilib (ümumi kompensasiya öhdəliyinin 99,2 faizi). 3 milyon 544 min manat ödənilməmiş kompensasiya öhdəliyi qalıb.
"Yunayted Kredit Bank" ASC-də fiziki şəxslərin ümumi əmanətlərin məbləği 3 milyon 550 min manatdır. Onlardan 3 milyon 230 min manatı qorunan əmanətlər, o cümlədən 2 milyon 99 min manatı kompensasiya olunan əmanətlərdir. Qorunan əmanətçilərə ümumilikdə 1 milyon 837 min manatdan çox kompensasiya ödənişi həyata keçirilib (ümumi kompensasiya öhdəliyinin 87,5 faizi) və 262 min 485 manat ödənilməmiş kompensasiya öhdəliyidir.
"Bank of Azerbaijan" ASC-nin qorunan əmanətçilərinə 24 milyon 191 min (ümumi kompensasiya öhdəliyinin 97 faizi), "Gəncəbank" ASC-nin əmanətçilərinə 976 min 441 manat (yəni ümumi kompensasiya öhdəliyinin 94 faizi), "Texnikabank" ASC-nin əmanətçilərinə 120 milyon 400 min manatdan çox (ümumi kompensasiya öhdəliyinin 98,2 faizi), "Parabank" ASC-nin əmanətçilərinə 43 milyon 222 min manatdan çox (ümumi kompensasiya öhdəliyinin 98,5 faizi), "Zaminbank" ASC-nin əmanətçilərinə 72 milyon 196 min manatdan çox (ümumi kompensasiya öhdəliyinin 99,3 faizi), "Kredobank" ASC-nin əmanətçilərinə 27 milyon 914 min manatdan çox (ümumi kompensasiya öhdəliyinin 99,9 faizi), "Dekabank" ASC-nin əmanətçilərinə 3 milyon 088 min manatdan çox (ümumi kompensasiya öhdəliyinin 98,7 faizi) kompensasiya ödənilib.